କଟକ: ଦଳ ବିରୋଧୀ କାର୍ଯ୍ୟକ୍ରମ ପାଇଁ ବାଜିଛି ଶୃଙ୍ଖଳା ଛାଟ । କଂଗ୍ରେସରୁ ନିଲମ୍ବିତ ହୋଇଛନ୍ତି ବାରବାଟୀ ବିଧାୟକ ମହମ୍ମଦ ମୋକିମ ଓ ଜଗତସିଂହପୁର ପୂର୍ବତନ ବିଧାୟକ ଚିରଞ୍ଜୀବ ବିଶ୍ବାଳ । ଏହାପରେ ରାଜ୍ୟ ରାଜନୀତି ସରଗରମ ହୋଇଛି । AICCର ଏହି ନିଷ୍ପତିକୁ ଗ୍ରହଣ କରିଛି ରାଜ୍ୟ କଂଗ୍ରେସ । ମୋକିମ ଦଳରୁ ନିଲମ୍ବନ ହେଲା ପରେ ଆଜି ପ୍ରତିକ୍ରିୟା ରଖିଛନ୍ତି କଟକ ନଗର ସଭାପତି ସୁରେଶ ମହାପାତ୍ର । ଦଳ ଉପରେ ଏହାର କୌଣସି ପ୍ରଭାବ ପଡ଼ିବ ନାହିଁ ବୋଲି ସେ କହିଛନ୍ତି ।
ଏହା ମଧ୍ୟ ପଢ଼ନ୍ତୁ...ମହଙ୍ଗା ପଡ଼ିଲା ଦଳ ବିରୋଧୀ କାର୍ଯ୍ୟ, ମୋକିମ ଓ ଚିରଞ୍ଜୀବ କଂଗ୍ରେସରୁ ନିଲମ୍ବିତ
ଗତ ଝାରସୁଗୁଡ଼ା ଉପନିର୍ବାଚନ ପୂର୍ବରୁ ମୋକିମ ଏକ କାର୍ଯ୍ୟକ୍ରମ ଆୟୋଜନ କରିଥିଲେ । ଏଥିରେ ଚିରଞ୍ଜୀବ ବିଶ୍ବାଳ ମଧ୍ୟ ଯୋଗ ଦେଇଥିଲେ । ଉଭୟ ନେତା କଂଗ୍ରେସ ନେତୃତ୍ବ ଉପରେ ପ୍ରଶ୍ନ ଉଠାଇବା ସହ ଦଳ ବିରୋଧୀ ମନ୍ତବ୍ୟ ଦେଇଥିବା ଏଆଇସିସିକୁ ପିସିସି ସଭାପତି ଅଭିଯୋଗ କରିଥିଲେ । ଏହାପରେ ଉଭୟଙ୍କୁ କାରଣଦର୍ଶାଅ ନୋଟିସ୍ ଜାରି କରିଥିଲା ଏଆଇସିସି । ପରେ ଉଭୟଙ୍କ ଉତ୍ତର ସନ୍ତୋଷଜନକ ନଥିବା ଦର୍ଶାଇ ଉଭୟଙ୍କୁ ଦଳରୁ ନିଲମ୍ବନ କରିଛି ଏଆଇସିସି ଶୃଙ୍ଖଳା କମିଟି । ଏହାପରେ ମୋକିମ କିନ୍ତୁ କୌଣସି ଦଳ ବିରୋଧୀ କାର୍ଯ୍ୟକ୍ରମ କରିନାହାନ୍ତି ବା ଦଳ ବିରୋଧରେ ମନ୍ତବ୍ୟ ଦେଇନାହାନ୍ତି ବୋଲି କହିଛନ୍ତି । ସେ କହିଛନ୍ତି ମୁଁ କଂଗ୍ରେସରେ ଅଛି ଓ ରହିବି । କଂଗ୍ରେସରୁ ଟିକେଟ ମିଳିଲେ ଲଢ଼ିବି, ନମିଳିଲେ ସ୍ବାଧୀନ ଭାବେ ଲଢ଼ିବି ବୋଲି କହିଛନ୍ତି ମୋକିମ । ସେପଟେ ଏହା ଦଳ ଉପରେ କୌଣସି ପ୍ରଭାବ ପକାଇବ ନାହିଁ ବୋଲି ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ।