କଟକ: ଋଷୀୟ ପର୍ଯ୍ୟଟକଙ୍କ ମୃତ୍ୟୁ ମାମଲାରେ କ୍ରାଇମବ୍ରାଞ୍ଚର ସ୍ପଷ୍ଟୀକରଣ । ଭ୍ଲାଦିମିର ବିଦାନୋଭ ଓ ଆଣ୍ଟୋଭ ପାବେଲଙ୍କୁ ହତ୍ୟା କରାଯାଇନାହିଁ । ଏଭଳି କିଛି ତଥ୍ୟ ଓଡିଶା କ୍ରାଇମବ୍ରାଞ୍ଚ ହାତରେ ଲାଗିଛି । ସଂଗୃହିତ ତଥ୍ୟ, ପ୍ରମାଣ ଓ ସାକ୍ଷୀଙ୍କ ବୟାନରୁ ଉଭୟଙ୍କ ମୃତ୍ୟୁ ପଛରେ ବିଦେଶୀ ଶକ୍ତି କିମ୍ବା କୌଣସି ଷଡ଼ଯନ୍ତ୍ର ନଥିବା କଥା ସ୍ପଷ୍ଟ କରିଛି କ୍ରାଇମବ୍ରାଞ୍ଚ । ଅଟକ ରହିଥିବା ଋଷୀୟ ଦମ୍ପତି ପାନା ସାଙ୍କୋ ଓ ଟୁରଭୋଙ୍କୁ ମଧ୍ୟ ଏକ ପ୍ରକାର କ୍ଲିନ୍ଚିଟ ଦେଇଛି ତଦନ୍ତକାରୀ ସଂସ୍ଥା ।
କ୍ରାଇମବ୍ରାଞ୍ଚ ମୁଖ୍ୟାଳୟରୁ ମିଳିଥିବା ସୂଚନା ମୁତାବକ ଉଭୟଙ୍କ ମୃତ୍ୟୁ ଅପମୃତ୍ୟୁ ତରିକାଭୁକ୍ତ । ଏହି ମୃତ୍ୟୁ ସହିତ କୌଣସି ଅପରାଧିକ ଦିଗ ଜଡିତ ନୁହେଁ । ତେବେ ଅଧିକ ଅନୁସନ୍ଧାନ ପାଇଁ ଉଭୟ ଭ୍ଲାଦିମିର ବିଦାନୋଭ ଓ ଆଣ୍ଟୋଭ ପାବେଲଙ୍କ ଚିତାଭସ୍ମରୁ ସଂଗୃହିତ ହୋଇଥିବା ହାଡ ଓ ପାଉଁଶକୁ ପରୀକ୍ଷା ପାଇଁ ରାଜ୍ୟ ବାହାରେ କୌଣସି କେନ୍ଦ୍ରୀୟ ପରୀକ୍ଷାଗାରକୁ ପଠାଯିବ । ବିଶେଷ କରି ଭ୍ଲାଦିମିର ବିଦାନୋଭଙ୍କ ଭିସେରା ସଂରକ୍ଷିତ ଥିବାରୁ ତାହାକୁ ଯାଞ୍ଚ ପାଇଁ ଦିଲ୍ଲୀ ଏମ୍ସକୁ ପଠାଯିବ ବୋଲି ଜଣାପଡ଼ିଛି । ଭ୍ଲାଦିମିର ବିଦାନୋଭ ଓ ଆଣ୍ଟୋଭ ପାବେଲଙ୍କୁ କୌଣସି ବିଷାକ୍ତ ପଦାର୍ଥ ଦିଆଯାଇଥିଲା କି ନାହିଁ ତାହାର ଯାଞ୍ଚ ପାଇଁ ଏହି ସମସ୍ତ ପରୀକ୍ଷା କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି ।
ସେହିପରି ଭ୍ଲାଦିମିର ବିଦାନୋଭ ଓ ଆଣ୍ଟୋଭ ପାବେଲଙ୍କ ସହ ରାୟଗଡ଼ା ଆସିଥିବା ଋଷୀୟ ଦମ୍ପତିଙ୍କୁ ଏକ ପ୍ରକାର କ୍ଲିନ୍ଚିଟ ଦେଇଛି ତଦନ୍ତକାରୀ ସଂସ୍ଥା । ଉଭୟଙ୍କୁ ଲଗାତାର ୫ ଦିନ ଧରି ଜେରା କରିବା ସହ ଦୁଇ ସହଯାତ୍ରୀଙ୍କ ମୃତ୍ୟୁ ପଛରେ ଏହି ପତିପତ୍ନୀ ପାନା ସାଙ୍କୋ ଓ ଟୁରଭୋଙ୍କ କୌଣସି ଭୂମିକା ନଥିବା ତଦନ୍ତରୁ ଜାଣିବାକୁ ପାଇଛି କ୍ରାଇମବ୍ରାଞ୍ଚ । ଫଳସ୍ବରୂପ ଉଭୟଙ୍କ ବୟାନ ରେକର୍ଡ କରିବା ସହିତ ସେହି ସମୟର ଭିଡିଓଗ୍ରାଫି କରି ସେମାନଙ୍କୁ ନିଜ ହେଫାଜତରୁ ମୁକ୍ତ କରିଛି ତଦନ୍ତକାରୀ ଟିମ ।