କଟକ: ଦାଉ ସାଜିଲା ଦୁର୍ଘଟଣା । ଦୁର୍ଘଟଣାର ଶିକାର ହୋଇ ଏକ କୁଡ଼ିଆ ଭିତରେ ପଡି ରହିଛନ୍ତି କଟକ କାଠଯୋଡ଼ି ବସ୍ତିର ଦମ୍ପତି । ଦିନ ଥିଲା ହସ ଖୁସିରେ କଟୁଥିଲା ଭଉୟଙ୍କ ଜୀବନ । ହେଲେ ଗତ ମାର୍ଚ୍ଚ ମାସରେ ଦୁର୍ଘଟଣାର ଶିକାର ହେବା ପରେ ସବୁକିଛି ଛାରଖାର ହୋଇଯାଇଛି । ନା ଦି ମୁଠା ଖାଇବାକୁ ମିଳୁଛି ନା ବାହାରକୁ ଯାଇ କୌଣସି କାମ କରି ପାରୁଛନ୍ତି । ସେପଟେ ଏପର୍ଯ୍ୟନ୍ତ କୌଣସି ସରକାରୀ ସହାୟତା ମଧ୍ୟ ମିଳିନାହିଁ ।
କଟକ କାଠଯୋଡି ବସ୍ତିରେ ରୁହନ୍ତି କୈଳାସ ନାୟକ ଓ ବନିତା ନାୟକ । ସ୍ବାମୀ ହୋଟେଲେ ଓ ସ୍ତ୍ରୀ ଅନ୍ୟ ଘରେ କାମ କରି ଯାହା ରୋଜଗାର କରୁଥିଲେ ସେଥିରେ ଆରମରେ ଘର ଚଳୁଥିଲା । ହେଲେ ମାର୍ଚ୍ଚ ମାସରେ ଦୁର୍ଘଟଣାର ଶିକାର ହୋଇଥିଲେ ଦମ୍ପତି । ଦୁର୍ଘଟଣାଟି ଏମିତି ଥିଲା କି ଉଭୟଙ୍କ ଗୋଡ ହାତ ଭାଙ୍ଗି ଯାଇଥିଲା। ଉଭୟଙ୍କୁ ପ୍ରଥମେ ଅଶ୍ବିନୀ ହସପିଟାଲରେ ଭର୍ତ୍ତି କରି ଚିକିତ୍ସିତ କରାଯାଇଥିଲା । କିଛିଦିନ ପରେ ଅପରେସନ କରି ଏସସିବିକୁ ସ୍ଥାନାନ୍ତର କରାଗଲା । ମାତ୍ର ଏସସିବିରେ ବି ଠିକ ଭାବରେ ଚିକିତ୍ସା ମିଳିଲାନି । ତେବେ ସେବେ ଠାରୁ ବନ୍ଦ ହୋଇଯାଇଛି ଉଭୟଙ୍କ ରୋଜଗାର ।