କଟକ: ଓଡ଼ିଶା ରାଜ୍ୟ ସମବାୟ ବ୍ୟାଙ୍କ ପରିଚାଳନା ନିର୍ଦ୍ଦେଶକ ନିଯୁକ୍ତି ବିବାଦ ମାମଲାରେ ହାଇକୋର୍ଟଙ୍କ ଗୁରୁତ୍ବପୂର୍ଣ୍ଣ ନିର୍ଦ୍ଦେଶ । ଅବସରପ୍ରାପ୍ତ ପ୍ରଶାସକ ଗୋପବନ୍ଧୁ ଶତପଥୀଙ୍କ ପୁନଃନିଯୁକ୍ତି ଉପରେ ହାଇକୋର୍ଟ ଅନ୍ତରୀଣ ରହିତାଦେଶ ଜାରି କରିଛନ୍ତି । ଏଥିସହ ତୁରନ୍ତ ନିଜ ଦାୟିତ୍ୱ ସମବାୟ ନିବନ୍ଧକଙ୍କୁ ହସ୍ତାନ୍ତର କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।
ଏହା ପୂର୍ବରୁ ଜାନୁଆରୀ ୨୫ ତାରିଖରେ ଏହି ମାମଲାର ଶୁଣାଣି ହୋଇଥିଲା । ହାଇକୋର୍ଟ ଗୋପବନ୍ଧୁଙ୍କ ନିଯୁକ୍ତି ବେଆଇନ ବୋଲି ରାୟ ଶୁଣାଇଥିଲେ । ହାଇକୋର୍ଟଙ୍କ ନିର୍ଦ୍ଦେଶକୁ ବେଖାତିର କରି ଜାନୁଆରୀ ୨୫ ତାରିଖରେ ତାଙ୍କୁ ପୁନଃନିଯୁକ୍ତି ଦେବାକୁ ସରକାର ବିଜ୍ଞପ୍ତି ଜାରି କରିଥିଲେ । ଏହି ଘଟଣାକୁ କୋର୍ଟ ଅତି ଗମ୍ଭୀରତାର ସହ ନେଇଥିଲେ । ଏହି ପ୍ରସଙ୍ଗରେ ଆଜି ଶୁଣାଣି କରି ରାଜ୍ୟ ସରକାରଙ୍କ ସମବାୟ ବ୍ୟାଙ୍କ ଏବଂ ଅନ୍ୟମାନଙ୍କୁ ଜବାବ ଦେବାକୁ ନୋଟିସ ଜାରି କରିଛନ୍ତି ଉଚ୍ଚ ନ୍ୟାୟାଳୟ ।
ଓଡିଶା ରାଜ୍ୟ ସମବାୟ ବ୍ୟାଙ୍କ ପରିଚାଳନା ନିର୍ଦ୍ଦେଶକଙ୍କ ନିଯୁକ୍ତି ମାମଲାରେ ନିଯୁକ୍ତିକୁ ଅବୈଧ ଘୋଷଣା କରିଥିଲେ ଓଡିଶା ହାଇକୋର୍ଟ । ଗୋପବନ୍ଧୁ ଶତପଥୀଙ୍କ ପୁନଃନିଯୁକ୍ତିକୁ ରଦ୍ଦ କରିଥିଲେ ହାଇକୋର୍ଟ । ଗତବର୍ଷ (୨୦୨୨) ମାର୍ଚ୍ଚ ୨ ତାରିଖରେ ଗୋପବନ୍ଧୁଙ୍କୁ ପରିଚାଳନା ନିର୍ଦ୍ଦେଶକ (ଏମଡି) ଭାବେ ପୁନଃନିଯୁକ୍ତ କରିଥିଲେ ରାଜ୍ୟ ସରକାର । କିନ୍ତୁ ଏଥିପାଇଁ ରିଜର୍ଭ ବ୍ୟାଙ୍କ ଅଫ ଇଣ୍ଡିଆର ଅନୁମତି ନଥିଲା । ଏଭଳି ନିଯୁକ୍ତି ରାଜ୍ୟ ସମବାୟ ଆଇନ ସମ୍ମତ ନୁହେଁ ବୋଲି ଦର୍ଶାଇଥିଲେ କୋର୍ଟ । ଏହାକୁ ସୁନ୍ଦରଗଡ଼ର ବେଣୁମାଧବ ତ୍ରିପାଠୀ ହାଇକୋର୍ଟରେ ଚାଲେଞ୍ଜ କରିଥିଲେ ।