କଟକ: ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ କଟକରେ ଆକ୍ରାନ୍ତଙ୍କ ସଂଖ୍ୟା 500 ଅତିକ୍ରମ କରିଛି । ପ୍ରତିଦିନ ଜିଲ୍ଲାରେ ଆକ୍ରାନ୍ତ ଚିହ୍ନଟ ହେଉଛନ୍ତି । ଏଭଳି ସ୍ଥିତିରେ ଏହାର ମୁକାବିଲା ପାଇଁ କଣ ସବୁ ପଦକ୍ଷେପ ନିଆଯିବ ସେ ନେଇ ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଏକ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି ।
କଟକ ଜିଲ୍ଲାର ପର୍ଯ୍ୟବେକ୍ଷକ ଦାୟିତ୍ବରେ ରହିଥିବା ସୌରଭ ଗର୍ଗଙ୍କ ଅଧ୍ୟକ୍ଷତାରେ ଏହି ବୈଠକ ବସିଥିଲା । ଏଥିରେ କଟକ ଜିଲ୍ଲାପାଳଙ୍କ ସମେତ ପୋଲିସ କମିଶନର, କଟକ ଡିସିପି, ସିଏମସି କମିଶନର ଓ ଅନ୍ୟାନ୍ୟ ବିଭାଗର ଅଧିକାରୀ ମାନେ ଉପସ୍ଥିତ ରହିଥିଲେ । ଜିଲ୍ଲାର ପ୍ରତିଟି ବ୍ଲକ ଓ ସିଏମସିରେ କୋରୋନାର ସ୍ଥିତି କିପରି ରହିଛି ସେ ନେଇ ପୁଙ୍ଖାନୁପୁଙ୍ଖ ଅନୁଧ୍ୟାନ କରାଯାଇଥିଲା । ତେବେ କଟକ ଜିଲ୍ଲାରେ କୋରୋନା ସ୍ଥିତି ଭଲ ଥିବା ସୌରଭ ଗର୍ଗ କହିଛନ୍ତି । ସେପଟେ ହୋମ କ୍ବାରେନଣ୍ଟାଇନରେ ଥିବା ପ୍ରତ୍ୟେକଙ୍କ ଉପରେ ଜିଲ୍ଲାପ୍ରଶାସନ ନଜର ରଖିଥିବା କହିଛନ୍ତି କଟକ ଜିଲ୍ଲାପାଳ ।
କଟକରୁ ନାରାୟଣ ସାହୁ, ଇଟିଭି ଭାରତ