କଟକ: ଦେଶରେ ରନ୍ଧନ ଗ୍ୟାସ, ପେଟ୍ରୋ-ଡିଜେଲ ଆଦି ନିତ୍ୟ ବ୍ୟବହାର୍ଯ୍ୟ ଦ୍ରବ୍ୟର ମୂଲ୍ୟ ଅହେତୁକ ବୃଦ୍ଧି ପାଇଛି । ଯାହାକୁ ନେଇ ସାଧାରଣ ଲୋକେ ହନ୍ତସନ୍ତ ହେଉଛନ୍ତି । ଗ୍ୟାସ୍ ଓ ତୈଳ ଦାମ ବୃଦ୍ଧିକୁ ବିରୋଧ କରି ଗର୍ଜିଛି ଏସ.ୟୁ.ସି.ଆଇ(SUCI) କମ୍ୟୁନିଷ୍ଟ । ଦଳ ପ୍ରଧାନମନ୍ତ୍ରୀ ମୋଦିଙ୍କ କୁଶ ପୁତ୍ତଳିକା ଦାହ କରିଛି । ସଂଗଠନର ସଦସ୍ୟ କହିଛନ୍ତି, ''ସରକାରଙ୍କ ବିଭିନ୍ନ ଜନମାରଣ ନୀତି ଯୋଗୁଁ ବର୍ତ୍ତମାନ ଦେଶ ହାହାକାର ପରିସ୍ଥିତ ଦେଇ ଗତି କରୁଛି । କୋଟି କୋଟି ଲୋକେ ରୋଜଗାର ହରାଇବା ସହ ଅନାହାର ଓ ଅର୍ଦ୍ଧାହାରରେ କାଳତିପାତ କରୁଛନ୍ତି । ମଧ୍ୟବିତ୍ତ ଶ୍ରେଣୀର ଆର୍ଥିକ ମେରୁଦଣ୍ଡ ସଂପୂର୍ଣ୍ଣ ଦୋହଲି ଯାଇଛି ।''
SUCI କମ୍ୟୁନିଷ୍ଟ ଅଭିଯୋଗ କରିଛି ଯେ, "ଏପରି ସ୍ଥିତିରେ ନିତ୍ୟ ବ୍ୟବହାର୍ଯ୍ୟ ଦ୍ରବ୍ୟ ମୂଲ୍ୟ ଆକାଶଛୁଆଁ ହେବା ବେଡି ଉପରେ କୋରଡା ମାଡ ସଦୃଶ ହୋଇଛି । ପ୍ରତିଦିନ ପେଟ୍ରୋଲ, ଡିଜେଲ୍ର ମୂଲ୍ୟ ବୃଦ୍ଧି ଘଟୁଛି । ତେଲ ଦର ବଢି ବଢି ବର୍ତ୍ତମାନ ଆମ ରାଜ୍ୟରେ ପେଟ୍ରୋଲ ଲିଟର ପିଛା ୧୧୨ ଟଙ୍କା ଅତିକ୍ରମ କରିଥିବା ବେଳେ ଡିଜେଲ ୧୦୨ ଟଙ୍କା ଅତିକ୍ରମ କରିଛି । ଶନିବାର ରନ୍ଧନ ଗ୍ୟାସର ମୂଲ୍ୟ ଆଉ ୫୦ ଟଙ୍କା ବୃଦ୍ଧି ପାଇ ୧,୦୨୬ ଟଙ୍କାରେ ପହଞ୍ଚିଛି । ଏହି ମୂଲ୍ୟ ବୃଦ୍ଧି ସଂପର୍କରେ କେନ୍ଦ୍ର ସରକାର ବିଭିନ୍ନ ସମୟରେ ବିଭିନ୍ନ ପ୍ରକାରର ମିଥ୍ୟା ସଫେଇ ଦେଉଛନ୍ତି ।"