କଟକ: ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ କଟକରେ ଆକ୍ରାନ୍ତଙ୍କ ସଂଖ୍ୟା 500 ଅତିକ୍ରମ କରିଛି । ସେପଟେ କଟକ ସିଡିଏ ସେକ୍ଟର-9 ଅଞ୍ଚଳକୁ କଣ୍ଟେନମେଣ୍ଟ ଜୋନ ଭାବେ ଘୋଷଣା କରାଯାଇଛି । ଉକ୍ତ ଅଞ୍ଚଳରୁ ଜଣେ କୋରୋନା ପଜିଟିଭ ଚିହ୍ନଟ ହେବା ପରେ କଟକ ମହାନଗର ନିଗମ ଏଭଳି ନିଷ୍ପତ୍ତି ନେଇଛି ।
ସୂଚନାନୁଯାୟୀ, ବଡମ୍ବା ଥାନାଧିକାରୀ କୋରୋନା ପଜିଟିଭ ଚିହ୍ନଟ ହୋଇଛନ୍ତି । ସମ୍ପୃକ୍ତ ଥାନାଧିକାରୀ ସିଡ଼ିଏ ସେକ୍ଟର-୯ ଅଞ୍ଚଳରେ ରହୁଥିଲେ । ତେବେ ଦକ୍ଷିଣରେ ମୁଖ୍ୟ ରାସ୍ତାର ଡି-୪୭ ରୁ ଡି-୪୯ ପର୍ଯ୍ୟନ୍ତ ରାସ୍ତାକୁ ସିଲ କରାଯାଇଛି । ସେହିପରି ପଶ୍ଚିମରେ ଡି-୧ ରୁ ବି-୩୪ ପର୍ଯ୍ୟନ୍ତ ରାସ୍ତାକୁ ସିଲ କରାଯାଇଥିବା ବେଳେ ଉତ୍ତରରେ ଆମ୍ବତୋଟା ରାସ୍ତାର ଡି -୧ ରୁ ବି -୩୪ ପର୍ଯ୍ୟନ୍ତ ରାସ୍ତାକୁ ସିଲ କରାଯାଇଛି । ପୂର୍ବରେ ମଧ୍ୟ ବି -୩୫ ପ୍ଲଟରୁ ଏ -୪୩ ପର୍ଯ୍ୟନ୍ତ ପ୍ଲଟ ପଛକୁ ସିଲ କରାଯାଇଛି । ଉକ୍ତ ଅଞ୍ଚଳରେ ଗାଡି ଚଳାଚଳ ଓ ଲୋକଙ୍କ ଗମନାଗମନ ବାରଣ କରାଯାଇଥିବା ବେଳେ ସରକାରୀ ଓ ଘରୋଇ ଅନୁଷ୍ଠାନକୁ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି ।