କଟକ: କଟକରେ ପ୍ରଧାନମନ୍ତ୍ରୀ ଆବାସ ଯୋଜନାରେ ବ୍ୟାପକ ଅନିୟମିତତା ଅଭିଯୋଗ ହୋଇଛି । ଯୋଗ୍ୟ ହିତାଧିକାରୀଙ୍କ ସ୍ଥାନରେ ଅଯୋଗ୍ୟଙ୍କୁ ସ୍ଥାନ ମିଳିଛି । ଯାହାକୁ ନେଇ ଆଜି(ଶୁକ୍ରବାର) କଟକ ସଦର ବ୍ଲକ ଅଫିସ ଘେରାଉ କରିଛି ବିଜେପି । ସଦର ବ୍ଲକ୍ ଅଫିସ୍ ସମ୍ମୁଖରେ ବିକ୍ଷୋଭ ପ୍ରଦର୍ଶନ ସହ ଗର୍ଜିଛି କଟକ ସଦର ବିଜେପି । କଟକ ସଦର ବ୍ଲକରେ ଫନି ବାତ୍ୟା ସମୟରେ ଭାଙ୍ଗିଯାଇଥିଲା । ୫୬୦ ଜଣ ହିତାଧିକାରୀଙ୍କୁ ଏହି ଘର ପାଇବାକୁ ତାଲିକାଭୁକ୍ତ କରାଯାଇଥିଲା ।
ହେଲେ ଏହି ତାଲିକାରେ ବେଶ୍ ଅନିୟମିତତା କରାଯାଇଥିବା ଅଭିଯୋଗ କରିଛନ୍ତି ବିଜେପିର ବରିଷ୍ଠ ନେତା ଦିଲୀପ ମଲ୍ଲିକ । ତାଙ୍କ ଅଭିଯୋଗ ଅନୁସାରେ , ଯେଉଁମାନେ ଯୋଗ୍ୟ ହିତାଧିକାରୀ ଥିଲେ ସେମାନେ ଏହି ତାଲିକାରୁ ବଞ୍ଚିତ ହୋଇଥିବା ବେଳେ ଅଯୋଗ୍ୟ ହିତାଧିକାରୀମାନେ ଏହାର ତାଲିକା ଭୁକ୍ତ ହୋଇଛନ୍ତି । ଖାଲି ସେତିକି ନୁହେଁ 20 ହଜାର ଟଙ୍କା ନେଇ ଲୋକଙ୍କୁ ତାଲିକାଭୁକ୍ତ କରାଇ ଦେବା ପାଇଁ କିଛି ଶାସକ ଦଳର କର୍ମୀ ଓ ବ୍ଲକ୍ର ଅସାଧୁ କର୍ମଚାରୀମାନେ ଦୁର୍ନୀତି କରିଥିବାର ଅଭିଯୋଗ କରିଛନ୍ତି ସଦର ବିଜେପିର ନେତା ଦିଲ୍ଲୀପ ମଲ୍ଲିକ ।
ଏଥିସହ ଏହି ଅନିୟମିତତାର ଶୀଘ୍ର ସମାଧାନ ପାଇଁ ଦାବି କରିଛି ବିଜେପି । ନହେଲେ ଆଗାମୀ ଦିନରେ ବ୍ଲକ ଅଫିସ ଅଚଳ ହେବା ନେଇ ଚେତାବନୀ ମଧ୍ୟ ଦେଇଛି ଭାରତୀୟ ଜନତା ପାର୍ଟି । ବର୍ଷବର୍ଷ ଧରି କଟକରେ ହିତାଧୀକାରୀଙ୍କୁ ଏଭଳି ଭାବରେ ଅବହେଳା କରାଯାଉଥିବା ଅଭିଯୋଗ କରିଛି ବିଜେପି । ଏହାପରେ କଟକ ସଦରରେ ଆବାସ ଯୋଜନାର ସମ୍ପୂର୍ଣ୍ଣ ଅନିୟମିତତା ଦୃଶ୍ୟ ଏବେ ପଦାରେ ପଡିଛି ।