'ରାଜ୍ୟ ରାଜନୀତି ହରାଇଲା ଏକ ଭଲ ନେତୃତ୍ବ'

ପାଟକୁରା ବିଜେଡି ପ୍ରାର୍ଥୀ ତଥା ବରିଷ୍ଠ ବିଜେଡି ନେତା ବେଦପ୍ରକାଶ ଅଗ୍ରୱାଲଙ୍କ ପରଲୋକ । ବିଭିନ୍ନ ଦଳରୁ ବହୁ ବିଶିଷ୍ଟ ନେତାମାନେ ତାଙ୍କ ବିୟୋଗରେ ଶୋକବ୍ୟକ୍ତ କରିଛନ୍ତି । ତେବେ ତାଙ୍କ ବିୟୋଗରେ ବିଜେପି ନେତା ପ୍ରକାଶ ବେହେରା ନିଜର ଶୋକପ୍ରକାଶ କରିଛନ୍ତି ।

କଟକ: ଏପ୍ରିଲ 20 ତାରିଖ ଥିଲା ରାଜ୍ୟ ରାଜନୀତିର ଏକ ଅଶୁଭ ଦିନ । କାରଣ ପାଟକୁରା ବିଜେଡି ପ୍ରାର୍ଥୀ ତଥା ବରିଷ୍ଠ ବିଜେଡି ନେତା ବେଦପ୍ରକାଶ ଅଗ୍ରୱାଲଙ୍କ ହୋଇଛି ପରଲୋକ । ଭୁବନେଶ୍ବରର ଏକ ଘରୋଇ ହସ୍ପିଟାଲରେ ତାଙ୍କର ପରଲୋକ ଘଟିଛି । ଦୀର୍ଘ ଦିନ ଧରି ସେ ଅସୁସ୍ଥ ମଧ୍ୟ ଥିଲେ । ପାଟକୁରାରୁ 2009 ଓ 2014 ରେ ବିଧାୟକ ଥିଲେ ବେଦପ୍ରକାଶ । ଏହାପୂର୍ବରୁ କେନ୍ଦ୍ରାପଡାରୁ 4 ଥର ବିଧାୟକ ଭାବେ ନିର୍ବାଚିତ ହୋଇଥିଲେ ଦିବଙ୍ଗତ ନେତା ବେଦପ୍ରକାଶ ।

ତେବେ ତାଙ୍କ ବିୟୋଗରେ ସାରା ରାଜ୍ୟରେ ଶୋକର ଛାୟା ଖେଳିଯାଇଛି । ବିଭିନ୍ନ ଦଳରୁ ବହୁ ବିଶିଷ୍ଟ ନେତାମାନେ ତାଙ୍କ ବିୟୋଗରେ ଶୋକବ୍ୟକ୍ତ କରିଛନ୍ତି । ତେବେ ତାଙ୍କ ବିୟୋଗରେ ବିଜେପି ନେତା ପ୍ରକାଶ ବେହେରା ନିଜର ଶୋକ ପ୍ରକାଶ କରିଛନ୍ତି ।

ଚଳିତ ନିର୍ବାଚନରେ ବେଦପ୍ରକାଶଙ୍କୁ ପାଟକୁରା ଆସନରେ ପ୍ରାର୍ଥୀ କରିଥିଲା ବିଜେଡି । ବିଜେପିରୁ ପ୍ରାର୍ଥୀ ହୋଇଥିଲେ ବିଜୟ ମହାପାତ୍ର । ଉଭୟଙ୍କ ମଧ୍ୟରେ କଡା ଟକ୍କର ହେବ ବୋଲି ଆଶା କରାଯାଉଥିଲା । ହେଲେ ବେଦପ୍ରକାଶଙ୍କ ମୃତ୍ୟୁ ପରେ ନିର୍ବାଚନ ବାତିଲ ହୋଇଛି ।

କଟକରୁ ନାରାୟଣ ସାହୁ, ଇଟିଭି ଭାରତ