କଟକ:ଗତକାଲି କଟକ କ୍ୟାଣ୍ଟେନମେଣ୍ଟ ଥାନାରୁ ଚମ୍ପଟ ମାରିଥିବା ଯୁବକଙ୍କ ମୃତଦେହ ଉଦ୍ଧାର ହୋଇଛି । ଆଜି(ଶନିବାର) ସକାଳୁ ଯୋବ୍ରା ବ୍ୟାରେଜରୁ ମୃତଦେହ ମିଳିଛି । ମୃତ ଯୁବକଙ୍କ ନାମ ଶଙ୍କର୍ଷଣ ବେହେରା ଓରଫ ବବୁଲୁ । ଗତକାଲି(ଶୁକ୍ରବାର) କ୍ୟାଣ୍ଟେନମେଣ୍ଟ ପୋଲିସ ଅଧିକାରୀଙ୍କୁ ଧକ୍କା ମାରି ସେ ଫେରାର ହୋଇଯାଇଥିଲେ । ଶଙ୍କର୍ଷଣ ଥାନା ସାମ୍ନାରେ ମହାନଦୀରେ ଥିବା ଗଡଗଡିଆ ଘାଟକୁ ଦୌଡି ପଳାଇଥିଲେ । ଏହାର ଏକ ଭିଡିଓ ଭାଇରାଲ ହୋଇଥିଲା । ଆଜି ତାଙ୍କର ମୃତଦେହ ଠାବ ହୋଇଛି । ପରିବାର ଲୋକେ ମୃତଦେହ ଚିହ୍ନଟ କରିବା ସହ ମୃତ୍ୟୁ ପାଇଁ ପୋଲିସକୁ ଦାୟୀ କରିଛନ୍ତି । ପୋଲିସ ଅତ୍ୟାଚାର ସହି ନପାରି ସେ ଥାନାରୁ ପଳାଇ ଯାଇଥିବା ଅଭିଯୋଗ ଆଣିଛନ୍ତି ।
ଏହାମଧ୍ୟ ପଢନ୍ତୁ: ପୋଲିସ ପଞ୍ଝାରୁ ଅଭିଯୁକ୍ତ ମହାନଦୀରେ ନିଖୋଜ, ପରିବାର ଆଣିଲା ସଙ୍ଗିନ ଅଭିଯୋଗ
ସୂଚନା ମୁତାବକ, ଏକ ମୋବାଇଲ ଚୋରି ମାମଲାରେ ପୋଲିସ ଶଙ୍କର୍ଷଣଙ୍କୁ ଥାନାକୁ ଆଣିଥିଲା । ପ୍ରଥମେ ତାଙ୍କୁ ବିଡାନାସୀ ଓ ପରେ କ୍ୟାଣ୍ଟେନମେଣ୍ଟ ଥାନାକୁ ନିଆଯାଇଥିଲା । ଗତକାଲି (ଶୁକ୍ରବାର) ସକାଳୁ ସେ ପୋଲିସ ହେପାଜତରୁ ଚମ୍ପଟ ମାରିଥିଲେ । ଅନ୍ୟପଟେ ପୋଲିସ ହେପାଜତରେ ଶଙ୍କର୍ଷଣଙ୍କୁ ଖୁବ ମାଡ ମରା ଯାଇଥିଲା । ଶାରିରୀକ ନିର୍ଯାତନା ସହ ନ ପାରି ସେ ଭୟରେ ଫେରାର ହୋଇଯାଇଛି ବୋଲି ଶଙ୍କର୍ଷଣଙ୍କ ବାପାମାଆ ଅଭିଯୋଗ ଆଣିଥିଲେ ।