କଲରାପତରିଆକୁ କାବୁ କରିବ ବନ ବିଭାଗ, ଆସିଲା ଯନ୍ତା

ରାଜଧାନୀରେ ଦୁଇଦିନ ଧରି ଆତଙ୍କ ଖେଳାଇ ଚାଲିଥିବା କଲରାପତରିଆ ବାଘ ଜଲଦି ଧରାହେବ। ସ୍ୱତନ୍ତ୍ର ଟ୍ରାଙ୍କୁଲାଇଜ ଟିମ୍ ଏବଂ ଯନ୍ତା ସହ ଅପରେସନ ଅପେକ୍ଷାରେ ବନ ବିଭାଗ।

ଭୁବେନଶ୍ୱର: ଦୁଇ ଦିନଧରି ଭୟଭୀତ ଅବସ୍ଥାରେ ରହିଛନ୍ତି ରାଜଧାନୀବାସୀ। ଗଳିକନ୍ଦିରେ ବୁଲୁଛି କଲରାପତରିଆ ବାଘ । ଏହାଭିତରେ ବାଘ ଧରିବାକୁ ପ୍ରକ୍ରିୟା ଆରମ୍ଭ କରିଛି ଜଙ୍ଗଲ ବିଭାଗ। ନନ୍ଦନକାନନରୁ ଅଣାଯାଇଛି ସ୍ୱତନ୍ତ୍ର ଯନ୍ତା। ଆଉ ଏଥିପାଇଁ ନିୟୋଜିତ ହୋଇଛନ୍ତି 40 ଜଣିଆ ଟିମ୍।

ଗତ ଦୁଇ ଦିନଧରି ପଳାଶପଲ୍ଲୀ ଅଞ୍ଚଳରେ ଏକ ପ୍ରକାରର କୋକୁଆ ଭୟ ଖେଳିଯାଇଥିଲା। ଏପରିକି ଘରୁ ଗୋଡ଼ କାଢ଼ିବାକୁ ଡରୁଥିଲେ ଲୋକେ । ଯାହାକୁ ନେଇ ରାତି ତମାମ ବନ ବିଭାଗର ଅଧିକାରୀ ନୟାନ୍ତ ହୋଇଯାଇଥିଲେ। ସୂଚନା ଅନୁଯାୟୀ ଆଜି ଭୋର 4ଟାରେ ବାଘଟି ବିଜୁ ପଟ୍ଟନାୟକ ବିମାନବନ୍ଦର ପାଚେରୀ ଡେଇଁ ଯାଉଥିବାର ଜଣେ ପ୍ରତ୍ୟକ୍ଷଦର୍ଶୀ କହିଛନ୍ତି।

ସ୍ଥାନୀୟ ଲୋକଙ୍କ ସୂଚନା ଏବଂ ବନ ବିଭାଗର ଅନୁମାନ ମୁତାବକ ବାଘଟି ପାଣିପାଗ ବିଭାଗ ପାଖ ଜଙ୍ଗଲରେ ଲୁଚିଛି । ତେଣୁ ଭୁବନେଶ୍ୱର, ଫୁଲନଖରା, ମଞ୍ଚେଶ୍ଵର ଓ କଟକ ରେଞ୍ଜର ଅଧିକାରୀ ତାକୁ କାବୁ କରିବାକୁ ଏକାଠି ହୋଇଛନ୍ତି । ପୋଲିସ ପକ୍ଷରୁ ମଧ୍ୟ ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡି଼ କରାଯାଇଛି।

ବାଘ ଧରିବାକୁ ଅପରେସନ ଆଉ କିଛି ସମୟ ମଧ୍ୟରେ ଆରମ୍ଭ ହେବାକୁ ଯାଉଛି। ଏଥିପାଇଁ ରାସ୍ତାରେ ଗାଡ଼ି ଚଳାଚଳ ମଧ୍ୟ ବନ୍ଦ କରାଯାଇଛି। ବାଘକୁ ଟ୍ରାଙ୍କୁଲାଇଜ କରିବାକୁ ନନ୍ଦନକାନନରୁ 8 ଜଣିଆ ଟିମ୍ ଆସିଛନ୍ତି।

ଭୁବନେଶ୍ୱରରୁ ବିକାଶ କୁମାର ଦାସ, ଇଟିଭି ଭାରତ