ଭୁବନେଶ୍ବର: ଆସନ୍ତା ଜୁଲାଇ 5 ତାରିଖରେ ହେବାକୁ ଯାଉଛି ରାଜ୍ୟସଭା ଉପନିର୍ବାଚନ। ଏହି ଦିନ ରାଜ୍ଯର ଖାଲି ପଡୁଥିବା 3ଟି ଆସନ ପାଇଁ ହେବ ଭୋଟ୍। ଏଥିପାଇଁ ବିଜ୍ଞପ୍ତି ପ୍ରକାଶ ପାଇଛି। ଆଜି ଠାରୁ ଆଶାୟୀ ପ୍ରାର୍ଥୀ ନିଜ ନିଜର ନାମାଙ୍କନ ପତ୍ର ଦାଖଲ କରି ପାରିବେ। ଜୁନ 25 ତାରିଖ ହେଉଛି ନାମାଙ୍କନ ଦାଖଲର ଶେଷ ଦିନ। ଏନେଇ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସମୟ ସୀମା ଧାର୍ଯ୍ୟ କରିଛନ୍ତି।
ଆଜି ଠାରୁ 25 ତାରିଖ ପର୍ଯ୍ୟନ୍ତ ଦିନ 11ଟା ରୁ 3ଟା ମଧ୍ୟରେ ନିଜର ପ୍ରସ୍ତାବକଙ୍କ ସହ ପ୍ରାର୍ଥୀପତ୍ର ଦାଖଲ କରିପାରିବେ ଆଶାୟୀ। ଜୁନ 26 ତାରିଖରେ ଦାଖଲ ହୋଇଥିବା ନାମାଙ୍କନ ପତ୍ରର ହେବ ଯାଞ୍ଚ। ସେହିଦିନ ମଧ୍ୟ ପ୍ରାର୍ଥୀପତ୍ର ପ୍ରତ୍ୟାହାର କରିପାରିବେ ଆଶାୟୀ ପ୍ରାର୍ଥୀ। ବିଜେଡିର ପ୍ରତାପ ଦେବ ବିଧାନସଭାକୁ , ଅଚ୍ୟୁତ ସାମନ୍ତ ଏବଂ ସୌମ୍ୟରଞ୍ଜନ ପଟ୍ଟନାୟକ ଲୋକସଭାକୁ ନିର୍ବାଚିତ ହେବା ପରେ ସେମାନଙ୍କର ଆସନ ଖାଲିପଡୁଛି।