ଆରପାରିରେ ହାସ୍ୟ ଅଭିନେତା ସଲିଲ ମିତ୍ର

ଆଉ ନାହାଁନ୍ତି ହାସ୍ୟ ଅଭିନେତା ସଲିଲ ମିତ୍ର । ଓଡିଆ ସିନେ ଜଗତର ଜଣେ ଜଣାଶୁଣା ହାସ୍ୟ ଅଭିନେତା ସଲୀଲ । ସଲିଲଙ୍କ ମୃତ୍ୟୁ ଖବରରେ ସିନେ ଜଗତରେ ଶୋକର ଛାୟା ଖେଳିଯାଇଛି ।

ଭୁବନେଶ୍ବର: ହାସ୍ୟ ଅଭିନେତା ସଲିଲ ମିତ୍ରଙ୍କ ପରଲୋକ । କିଛି ଦିନ ପୂର୍ବରୁ ଏକ ସଡକ ଦୁର୍ଘଟଣାରେ କିମ୍ସ ହସ୍ପିଟାଲରେ ସେ ଚିକିତ୍ସିତ ହେଉଥିଲେ । ତେବେ ସୋମବାର ବିଳମ୍ବିତ ରାତିରେ ତାଙ୍କର ଦେହାନ୍ତ ହୋଇଛି ।

ଓଡିଆ ଚଳଚ୍ଚିତ୍ରର ଜଣେ ଜଣାଶୁଣା କମେଡିଆନ ସଲିଲ । କିଛି ଦିନ ପୂର୍ବରୁ ସେ ମୟୂରଭଞ୍ଜ ଗସ୍ତରେ ଯାଉଥିବା ବେଳେ କେନ୍ଦୁଝରରେ ଦୁର୍ଘଟଣାର ଶିକାର ହୋଇଥିଲେ । ସେବେଠାରୁ ସେ ଭୁବନେଶ୍ବରସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧିନ ଥିଲେ । ଚିକିତ୍ସାଧିନ ଅବସ୍ଥାରେ ତାଙ୍କର ଦେହାନ୍ତ ହୋଇଛି ।

ସଲିଲ ଓଲିଉଡ ଜଗତର ଜଣେ ଚିହ୍ନା ମୁହଁ ହୋଇଥିବା ବେଳେ ସେ ପାଖାପାଖି 50ରୁ ଊର୍ଦ୍ଧ୍ବ ଚଳଚ୍ଚିତ୍ରରେ ଅଭିନୟ କରିଛନ୍ତି । 'ଶାସ୍ତି' ଚଳଚ୍ଚିତ୍ରରୁ କ୍ୟାରିଅର ଆରମ୍ଭ କରିଥିବା ଏହି ହାସ୍ୟ ଅଭିନେତା ପରେ ବିଭିନ୍ନ ଫିଲ୍ମରେ ନିଜର ଦମଦାର ଅଭିନୟର ଯାଦୁରେ ଦର୍ଶକଙ୍କୁ ବାନ୍ଧି ରଖିଥିଲେ । ନିକଟରେ 'ଲଭ ଷ୍ଟେସନ', 'ଲଭ ପାଇଁ କୁଛ ଭି କରେଗା' ଓ 'ମହାନାୟକ' ରେ ସେ ନଜିର ଆସିଥିଲେ ।

ଭୁବନେଶ୍ବରରୁ ତାପସ ପରିଡା ଓ ଶତରୂପା ସାମନ୍ତରାୟ, ଇଟିଭି ଭାରତ