କୁଆଖାଇରେ ବୁଡି ଇଂଜିନିୟରିଂ ଛାତ୍ର ମୃତ

କୁଆଖାଇ ନଦୀରେ ବୁଡି ଜଣେ ଇଂଜିନିୟରିଂ ଛାତ୍ର ମୃତ୍ୟୁ ଘଟିଛି । ଗାଧୋଉଥିବା ବେଳେ ଘଟିଛି ଏହି ଅଘଟଣ ।

ଭୁବନେଶ୍ବର: କୁଆଖାଇ ନଦୀରେ ଅଘଟଣ । ଗାଧୋଇବା ବେଳେ ନଦୀରେ ବୁଡି ଜଣେ ଇଂଜିନିୟରିଂ ଛାତ୍ରର ମୃତ୍ୟୁ ହୋଇଥିବା ଅଭିଯୋଗ ହୋଇଛି । ମୃତ ଛାତ୍ର ଜଣକ ମହେନ୍ଦ୍ର ଖଟୁଆ ଓ ସେ କେନ୍ଦ୍ରାପଡାର ହୋଇଥିବା ଜଣାପଡିଛି । ସେ OEC କଲେଜର ଛାତ୍ର ହୋଇଥିବା ସୂଚନା ମିଳିଛି ।

ସୂଚନା ଅନୁଯାୟୀ, ରବିବାର ପ୍ରାୟ 2ଟା ସମୟରେ ରାଜଧାନୀ ଉପକଣ୍ଠ ବାଙ୍କୁଆଳସ୍ଥିତ କୁଆଖାଇ ଘାଟକୁ 4ଜଣ ଇଂଜିନିୟରିଂ ଛାତ୍ର ଗାଧୋଇବାକୁ ଯାଇଥିଲେ । ଗାଧୋଉଥିବା ବେଳେ ସେଥିମଧ୍ୟରୁ ଜଣେ ଛାତ୍ର ନଦୀରେ ବୁଡି ଯାଇଥିଲେ । ଏନେଇ ସଙ୍ଗେ ସଙ୍ଗେ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା ।

ପରେ ମୃତଦେହଟିକୁ ଟଙ୍କପାଣି ସ୍ଥିତ ବ୍ରିଜ ନିକଟରେ ଉଦ୍ଧାର କରାଯାଇଛି । ତେବେ ସହିଦ ନଗର ପୋଲିସ ଏକ ଅପମୃତ୍ୟୁ ମାମଲା ରୁଜ୍ଜୁ କରି ତଦନ୍ତ ଆରମ୍ଭ କରିଛି ।

ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ