ଭୁବନେଶ୍ବର: ରାଜଧାନୀରେ ହାଇଟେକ ବସ ରେ ନବୀନଙ୍କ ପ୍ରଚାର। ଆପଣମାନେ ମୋତେ ଆଶୀର୍ବାଦ ଦିଅନ୍ତୁ, ଶଙ୍ଖ ଚିହ୍ନରେ ଭୋଟ ଦିଅନ୍ତୁ କହି ପ୍ରଚାର ଆରମ୍ଭ କରିଛନ୍ତି ନବୀନ ପଟ୍ଟନାୟକ। ଗୁରୁବାର ଏକାମ୍ର ନିର୍ବାଚନ ମଣ୍ଡଳୀର ହାଇଟେକ ବସରେ ରୋଡ ସୋ କରିବା ଅବସରରେ ସାଧାରଣ ଜନତାଙ୍କୁ ଭୋଟ ଭିକ୍ଷା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।
ଏକାମ୍ର ନିର୍ବାଚନ ମଣ୍ଡଳୀ, ସୁନ୍ଦରପଦା ଠାରୁ ଆରମ୍ଭ କରି ଜାଗମରା ଛକ, ଆଇଟିଆର ଛକ,ଷ୍ଟେବର୍ଟ ସ୍କୁଲ ଛକ, ସିଆରପି ଛକ, ଏକାମ୍ର କାନନ ,ସଲିଆ ସାହି,ଜାଭିଅର ଛକ ତଥା ଉତ୍ତର ନିର୍ବାଚନ ମଣ୍ଡଳୀର ପଟିଆ,ରଘୁନାଥପୁର ନନ୍ଦନ କାନନ ଯାଏଁ ନିର୍ବାଚନୀ ପ୍ରଚାର କରିଥିଲେ ନବୀନ।
ଭିଡିଓ ସୌଜନ୍ୟ: ସମ୍ବାଦଦାତା, ଭୁବନେଶ୍ବର ପ୍ରଚାର ସମୟରେ ନବୀନଙ୍କ ନାମ ଜପି ତାଙ୍କୁ ଜିତେଇବା ପାଇଁ କହିଛନ୍ତି ବସ୍ତି ବାସିନ୍ଦା । ନବୀନ ଆମର ଆମେ ନବୀନର,ଗରିବ ମାନଙ୍କର ସେ ଭଗବାନ ଓ ମୋଦି କୁଆଡୁ ଆସିଛି ବୋଲି ନୂଆସାହି ବସ୍ତି ମହିଳା ସମର୍ଥକ କହିଛନ୍ତି। ମୋଦିଙ୍କୁ ଭୋଟ ଦେଲେ କଣ ହେବ ବୋଲି ପ୍ରଶ୍ନ କରିବା ସହ ନବୀନ ଜିତିଲେ ସାହାଯ୍ୟ କରିବେ ବୋଲି ମହିଳା ସମର୍ଥକ କହିଛନ୍ତି ।
ନବୀନ ବାବୁଙ୍କର ଆଦର୍ଶରେ ଆମେ ଅନୁପ୍ରାଣିତ। 'ନବୀନ ମୋ ପରିବାର; ଶଙ୍ଖ ମୋ ଚିହ୍ନ' । ନବୀନଙ୍କ ସଙ୍ଗେ କେହି ସରି ହେବେନି କହିଛନ୍ତି ଛାତ୍ର ନେତା ଆଦିତ୍ୟ ସାମଲ । ରାଜଧାନୀରେ ଛାତ୍ର ସଂସଦରୁ ବହୁ ପିଲାଏ ପ୍ରିୟ ମୁଖ୍ୟମନ୍ତ୍ରୀଙ୍କୁ ପାଖରୁ ଦେଖିବା ପାଇଁ ଆସିଛନ୍ତି ବୋଲି ନିତେଶ କାମଲ କହିଛନ୍ତି ।
ଉଲ୍ଲେଖଯୋଗ୍ୟ ଯେ ଗୁରୁବାର ଦ୍ବିତୀୟ ପର୍ଯ୍ୟାୟ ମତଦାନ ଶେଷ ହୋଇଛି । ଅନ୍ୟପଟେ ଆସନ୍ତା ୨୩ ତାରିଖରେ ତୃତୀୟ ପର୍ଯ୍ୟାୟ ମତଦାନ। ବିଭିନ୍ନ ରାଜନୈତିକ ଦଳର ହେଭିୱେଟ୍ମାନେ ହାଇ ଭୋଲଟେଡଜ୍ ପ୍ରଚାର, ରୋଡ୍ ସୋ, ସାଧାରଣ ସଭାରେ ଭୋଟରଙ୍କୁ ମନର କଥା କହି ଭୋଟ ଭିକ୍ଷା କରୁଛନ୍ତି । ଏହି କ୍ରମରେ ପ୍ରଥମକରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭୁବନେଶ୍ବର ୩ ଟି ନିର୍ବାଚନ ମଣ୍ଡଳୀରେ କଡା ସୁରକ୍ଷା ବଳୟରେ ହାଇଟେକ ବସରେ ପ୍ରଚାର କରିଥିଲେ। ହଜାର ହଜାର ସଂଖ୍ୟାରେ କର୍ମୀ ଓ ସମର୍ଥକ ନବୀନଙ୍କୁ ସ୍ବଗତ ଜଣାଇଛନ୍ତି। ନବୀନ ସାଂସଦ ପ୍ରାର୍ଥୀ ଅରୁପ ପଟ୍ଟନାୟକ, ବିଧାୟକ ପ୍ରାର୍ଥୀ ଅଶୋକ ପଣ୍ଡା, ଅନନ୍ତ ନାରାୟଣ ଜେନା ଓ ସୁଶାନ୍ତ ରାଉତଙ୍କ ପାଇଁ ପ୍ରଚାର କରିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରୟ, ଇଟିଭି ଭାରତ
