ଫେଲ ମାରିଛି ବସୁଧା ଯୋଜନା, ହନ୍ତସନ୍ତ ଗ୍ରାମବାସୀ

ବୌଦ୍ଧ ଜିଲ୍ଲାର ବିଭିନ୍ନ ଅଞ୍ଚଳରେ ପାନୀୟଜଳ ଉତ୍କଟ ଦେଖାଦେଇଛି । ପାନୀୟ ଜଳ ପାଇଁ ନାନା କଷ୍ଟ ସହୁଛନ୍ତି ଲୋକେ । ଅଧିକ ପଢ଼ନ୍ତୁ

ବୌଦ୍ଧ: ଖରା ଆରମ୍ଭରୁ ଦେଖାଦେଲାଣି ଜଳ କଷ୍ଟ । ବୌଦ୍ଧ ଜିଲ୍ଲାରେ ପାରଦ 44 ଡିଗ୍ରୀ ଛୁଇଁଥିବା ବେଳେ ବିଭିନ୍ନ ପଞ୍ଚାୟତରେ ପାନୀୟଜଳ ଉତ୍କଟ ପରିଲକ୍ଷିତ ହୋଇଛି । ଅଧିକାଂଶ ପଞ୍ଚାୟତରେ ଫେଲ ମାରିଛି ବସୁଧା ଯୋଜନା । ପାନୀୟ ଜଳ ଅଭାବରୁ ଉପାନ୍ତ ଅଞ୍ଚଳର ଲୋକେ ଦୂଷିତ ପାଣି ବ୍ୟବହାର ପାଇଁ ବାଧ୍ୟ ହେଉଛନ୍ତି ।

ପ୍ରଚଣ୍ଡ ଗ୍ରୀଷ୍ମପ୍ରବାହ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଅନ୍ୟପଟେ ଦାଉ ସାଧୁଛି ଜଳ ସଂକଟ । ବୌଦ୍ଧ ଜିଲ୍ଲାର ମହାନଦୀ ସମେତ ବିଭିନ୍ନ ଉପନଦୀରେ ଜଳପ୍ରବାହ ଶୁଖିବାକୁ ବସିଲାଣି । ହରଭଙ୍ଗା, କଣ୍ଟାମାଳ ଓ ବୌଦ୍ଧ ବ୍ଲକର ବିଭିନ୍ନ ପଞ୍ଚାୟତରେ ପାନୀୟଜଳର ସମସ୍ୟା ଦେଖାଦେଇଛି । ଆଢେଣୀଗଡ, ମହାଲିକପଡା, କୁଶଙ୍ଗ, ଟିକରପଡା,ବନ୍ଧାପଥର, ଆମ୍ବଝରୀ, ଶଗଡା, ବରଗୋଛା, ନାରାୟଣପ୍ରସାଦ,ଉମା ଭଳି ଅନେକ ପଞ୍ଚାୟତ ବାସୀ ପାଣି ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।

ଜିଲ୍ଲାରେ ବସୁଧା ଯୋଜନାରେ ପ୍ରତି ଗ୍ରାମକୁ ପାନୀୟ ଜଳ ଯୋଗାଇବା ପାଇଁ ପାଇପ ଲଗାଯାଇଛି । ହେଲେ ତାହା ଭଙ୍ଗାରୁଜା ହୋଇ ପଡିରହିଥିବା ଗ୍ରାମବାସୀ ଅଭିଯୋଗ କରିଛନ୍ତି । ପାଣି ଅଭାବରୁ ଉପାନ୍ତ ଅଞ୍ଚଳର ଲୋକେ ବାଧ୍ୟ ହୋଇ ଦୂଷିତ ପାଣି ବ୍ୟବହାର କରୁଛନ୍ତି । ତୁରନ୍ତ ଏଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ପଦକ୍ଷେପ ଗ୍ରହଣ ପାଇଁ ଦାବି ହୋଇଛି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ