ବୌଦ୍ଧ: ଜିଲ୍ଲାରେ କୋରୋନା ସ୍ଥିତିରେ ସୁଧାର ଆସୁଥିବା ବେଳେ ଏକ ବନ୍ଧରେ ଶହ ଶହ ଲୋକ ମାଛ ମାରୁଥିବାର ଏକ ଭିଡିଓ ଖୁବ ଭାଇରାଲ ହେବାରେ ଲାଗିଛି । ବୌଦ୍ଧ ଜିଲ୍ଲାରେ ଲଗାତାର ସପ୍ତାହେ ହେଲା ସଂକ୍ରମଣ ଦୁଇ ଶହ ତଳେ ରହୁଥିବା ବେଳେ ମଙ୍ଗଳବାର ଏହା ଦୁଇ ଅଙ୍କକୁ ଖସିଆସି 73ରେ ପହଞ୍ଚିଛି ।
ସଂକ୍ରମଣ କମୁଥିବା ସମୟରେ କୋରୋନା କଟକଣା ଉଲ୍ଲଂଘନ
ସଂକ୍ରମିତଙ୍କ ସଂଖ୍ୟା ହ୍ରାସ ପାଇଥିବାରୁ ଉଭୟ ଜିଲ୍ଲା ପ୍ରଶାସନ ଓ ଜିଲ୍ଲାବାସୀ ଆଶ୍ବସ୍ଥି ଅନୁଭବ କରିଛନ୍ତି । ତେବେ ଆଉ ଗୋଟିଏ ଦିନ ପରେ ସାବିତ୍ରୀ ଅମାବାସ୍ୟା ଥିବାରୁ ଜିଲ୍ଲାର ବିଭିନ୍ନ ହାଟ ବଜାରରେ ଅସମ୍ଭାଳ ଭିଡ ପରିଲକ୍ଷିତ ହୋଇଛି । କୋରୋନା କଟକଣାକୁ ବେଖାତିର କରି ଅନୁମତି ନଥିବା ଦୋକାନ ଓ ହାଟ ଗୁଡିକ ଖୋଲାଯାଇଥିବା ଅଭିଯୋଗ ହୋଇଛି । କଣ୍ଟାମାଳ ବ୍ଲକର ଆମ୍ବଗାଁ ହାଟରେ ଆଜି ପ୍ରବଳ ଭିଡ ସହିତ କୋଭିଡ କଟକଣାକୁ ଖୋଲାଖୋଲି ଉଲ୍ଲଂଘନ କରାଯାଇଥିଲା ।