ଲକଡାଉନ କଟକଣା କୋହଳ ପରେ ବୌଦ୍ଧରେ ଅଣାୟତ ପରିସ୍ଥିତି

ଲକଡାଉନ ନିୟମରେ ଆଂଶିକ କୋହଳ ହେବାର ପ୍ରଥମ ଦିନରେ ଅବ୍ୟବସ୍ଥା ଦେଖା ଦେଇଛି । ଯାହାକୁ ନେଇ ପ୍ରଶ୍ନ ଉଠାଇଛନ୍ତି ବୁଦ୍ଧିଜୀବି । ବିଶେଷ ଭାବରେ ବ୍ୟାଙ୍କ ଗୁଡିକରେ ସାମାଜିକ ଦୂରତା କଟକଣା ସମ୍ପୂର୍ଣ୍ଣ ଫେଲ ମାରିଲା ଭଳି ମନେ ହୋଇଛି ।

ବୌଦ୍ଧ: ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଗ୍ରୀନଜୋନରେ ଥିବା ବୌଦ୍ଧ ଜିଲ୍ଲାରେ ଲକଡାଉନ ନିୟମକୁ କିଛି ମାତ୍ରାରେ କୋହଳ କରିଛି ଜିଲ୍ଲା ପ୍ରଶାସନ । କିନ୍ତୁ ପ୍ରଥମ ଦିନରୁ ହିଁ ଯେଉଁ ଚିତ୍ର ଦେଖିବାକୁ ମିଳିଲା ସେଥିପାଇଁ ସମସ୍ତେ ଚିନ୍ତିତ ହୋଇପଡିଛନ୍ତି । ବୌଦ୍ଧ ସହରର ବିଭିନ୍ନ ବ୍ୟାଙ୍କରେ ସାମାଜିକ ଦୂରତା କଟକଣାକୁ ସମ୍ପୂର୍ଣ୍ଣ ରୂପେ ଅଣଦେଖା କରାଯାଇଛି ।

ସେପଟେ ସରସରା ଠାରେ ଗ୍ୟାସ ବିତରଣ କେନ୍ଦ୍ର ଓ ଉତ୍କଳ ଗ୍ରାମ୍ୟ ବ୍ୟାଙ୍କ ଆଗରେ ଛୋଟରୁ ବଡ ପର୍ଯ୍ୟନ୍ତ ଲୋକେ ଡହଡହ ଖରାରେ ଛିଡା ହେବାର ଦୃଶ୍ୟ ସମସ୍ତଙ୍କୁ ବିଚଳିତ କରିଛି । ଏ ସମ୍ପର୍କରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବି ଦାବି କରିଛନ୍ତି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ