ବୌଦ୍ଧ: ଜିଲ୍ଲାର ଅପହଞ୍ଚ ଇଲାକାରେ ପହଞ୍ଚି ପାରୁନି ସରକାରଙ୍କ ବିକାଶ ଗାଡି । ସାତ ସମୁଦ୍ର ତେର ନଈର ଗପରି ଭଳି ମନେ ହୁଏ ଏସବୁ ଅଞ୍ଚଳର କରୁଣ କାହାଣୀ । ସାଧାରଣ ଜୀବନ ଠାରୁ ଢେର ଦୂରରେ ଆଜିବି ଅତ୍ୟନ୍ତ ଅବହେଳିତ ଅବସ୍ଥାରେ କାଳ କାଟୁଛନ୍ତି ଲୋକ । ଏଭଳି ଏକ ଗ୍ରାମ ହେଲା ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ଛତରଙ୍ଗ ପଞ୍ଚାୟତ ଅନ୍ତର୍ଗତ ବାନ୍ଦିଗାଡୁ ଗ୍ରାମ ।
ଆଜି ବି ବିକାଶରୁ ବଞ୍ଚିତ ବାନ୍ଦିଗାଡୁ
ବୌଦ୍ଧ ଜିଲ୍ଲାର ତିନୋଟି ବ୍ଲକରେ ଏଭଳି ଦେଢଶହରୁ ଉର୍ଦ୍ଧ୍ବ ଅପହଞ୍ଚ ଗ୍ରାମ ରହିଛି । ତନ୍ମଧ୍ୟରୁ ବାନ୍ଦିଗାଡୁ ଗ୍ରାମ ଅନ୍ୟତମ । ସମ୍ପୂର୍ଣ୍ଣ ଆଦିବାସୀ ଅଧ୍ୟୁଷିତ ଏହି ଗ୍ରାମକୁ ବର୍ଷ ତମାମ ବାହ୍ୟ ଜଗତରୁ ବିଭିନ୍ନ ଜଙ୍ଗଲ ପାହାଡ ସହ ଝରଣା ବିଛିନ୍ନ କରି ରଖିଥାଏ । ଶିକ୍ଷା, ସ୍ବାସ୍ଥ୍ୟ, ବିଦ୍ୟୁତ, ପାନୀୟଜଳ ଭଳି ଯୋଜନା ଏଠାରେ ସାତ ସପନ । ଆଉ ଏହାର ପ୍ରମୁଖ କାରଣ ହେଲା ଯୋଗାଯୋଗରେ ବିଛିନ୍ନତା ।