ବୌଦ୍ଧ: ଜିଲ୍ଲାର ଏକ ଉପାନ୍ତ ତଥା ଆଦିବାସୀ ଅଧ୍ୟୁଷିତ ପଞ୍ଚାୟତ ହେଉଛି ଆମ୍ବଝରୀ । ଏଠାକାର ସମୁଦାୟ ଜନସଂଖ୍ୟାର ଅର୍ଦ୍ଧାଧିକ ହେଉଛନ୍ତି କନ୍ଧ ସଂପ୍ରଦାୟର ଆଦିମ ଜନଜାତି । ଅତ୍ୟନ୍ତ ସ୍ବାଧୀନ ଚେତା ଏହି ଦୁର୍ଦ୍ଦଶ ଜାତି ଏକଦା ଇଷ୍ଟ ଇଣ୍ଡିଆ କମ୍ପାନୀର ସୈନ୍ୟ ବାହିନୀକୁ ନାକେଦମ କରିଦେଇଥିଲେ । କିନ୍ତୁ ବର୍ତ୍ତମାନ ସମୟରେ ଏହି ଆଦିମ ଜନଜାତି ଉକ୍ତ ଆମ୍ବଝରୀ ପଞ୍ଚାୟତରେ ଆଦିବାସୀ ତାଲିକାରୁ ବାଦ ପଡିଯାଇଛନ୍ତି ।
ଘଟଣାଟି ଶୁଣିବାକୁ ଟିକେ ଅଡ଼ୁଆ ଲାଗୁଥିଲେ ବି ଏହା ସମ୍ପୂର୍ଣ୍ଣ ସତ୍ୟ । କୌଣସି କାରଣବଶତଃ ଏହି କନ୍ଧ ଜନଜାତି ଆଦିବାସୀ ତାଲିକାରୁ ବାଦ ପଡିବା ଯୋଗୁଁ ଏମାନେ ସରକାରଙ୍କ ବିଭିନ୍ନ କଲ୍ୟାଣକାରୀ ଯୋଜନାରୁ ଲାଭ ପାଇପାରୁ ନାହାଁନ୍ତି । ପଞ୍ଚାୟତ ପ୍ରତିନିଧିମାନେ ମଧ୍ୟ ଏସମ୍ପର୍କରେ ଜିଲ୍ଲା ପ୍ରଶାସନ ଓ ସ୍ଥାନୀୟ ବିଧାୟକଙ୍କୁ ଅବଗତ କରାଇଛନ୍ତି । କିନ୍ତୁ ଏଯାବତ ସେମାନଙ୍କୁ କୌଣସି ସୁଫଳ ମିଳିପାରିନଥିବା ଜଣାପଡିଛି । ତୁରନ୍ତ ଏହି ଆଦିମ କନ୍ଧ ଜନଜାତିକୁ ସେମାନଙ୍କ ହକ ପ୍ରଦାନ କରାଯିବାକୁ ସାଧାରଣରେ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ