ବୌଦ୍ଧ: ମହାନଦୀରେ ଅଣ୍ଡର ଓ୍ବାଟର ମକଡ୍ରିଲ ସମୟରେ ଦୁର୍ଘଟଣା ଘଟି ପାଣିରେ ବୁଡିଯାଇଥିଲେ ଆଇଆରବି ଯବାନ । ଦୀର୍ଘ ତିନି ଘଣ୍ଟା ପରେ ଯବାନଙ୍କ ମର ଶରୀର ନଦୀରୁ ଉଦ୍ଧାର ପରେ ପୋଷ୍ଟମଟମ ହୋଇଥିଲା । ଏହାପରେ ବଲାସିଙ୍ଗା ସ୍ଥିତ ପଞ୍ଚମ ଆଇଆରବି ବାଟାଲିୟନ କାର୍ଯ୍ୟାଳୟ ସମ୍ମୁଖରେ ଗାର୍ଡ ଅଫ ଅନର ପ୍ରଦାନ ସହିତ ନୀରବ ପ୍ରାର୍ଥନା କରି ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା ।
ଅନ୍ୟପଟେ ଆଇଆରବି ଯବାନଙ୍କ ମୃତ୍ୟୁ ମହାନଦୀରେ କିଭଳି ଓ କେଉଁ ପରିସ୍ଥିତିରେ ବୁଡି ମୃତ୍ୟୁ ହେଲା ସେନେଇ ସନ୍ଦେହ ପ୍ରକଟ କରିଛନ୍ତି ପରିବାର । ଦୀର୍ଘ ତିନି ଘଣ୍ଟା ପର୍ଯ୍ୟନ୍ତ ମୃତଶରୀରକୁ ଆମ୍ବୁଲାନ୍ସରେ ରଖି ପରିବାରର ସଦସ୍ୟମାନେ କାର୍ଯ୍ୟାଳୟ ସମ୍ମୁଖରେ ତଳେ ବସିରହିଥିଲେ । ଶେଷରେ ବୌଦ୍ଧ ଜିଲ୍ଲାପାଳ ଲଲାଟେନ୍ଦୁ ମିଶ୍ର ଓ ଏସପି ଭି ରଘୁନାଥ ରାଓ ଘଟଣାସ୍ଥଳରେ ପହଞ୍ଚି ମୃତ ଜବାନଙ୍କ ପରିବାର ସହ ଆଲୋଚନା କରିଥିଲେ । ସମସ୍ତ ପ୍ରକାର ସାହାଯ୍ୟ, ତଦନ୍ତ, ସହଯୋଗ ପାଇଁ ପ୍ରତିଶ୍ରୁତି ମିଳିବା ପରେ ପରିବାର ମୃତ ଜବାନଙ୍କ ମର ଶରୀରକୁ ନେଇ ଫୁଲବାଣୀ ଫେରିଥିଲେ ।