ବୌଦ୍ଧ:ବିଦ୍ୟୁତ୍ ବିଭାଗରେ କାମ କରୁଥିବା ବେଳେ ଚାଲିଯାଇଥିଲା ବାପାଙ୍କ ଜୀବନ । ଆଉ ବର୍ତ୍ତମାନ ପୁଅ ଉକ୍ତ ବିଦ୍ୟୁତ ବିଭାଗର ଅସ୍ଥାୟୀ କର୍ମଚାରୀ ଥିବା ବେଳେ ଟାଟା ପାଓ୍ବାରର ଅତ୍ୟାଚାରର ଶିକାର ହେଉଥିବା ଅଭିଯୋଗ ହୋଇଛି । ତେବେ ଏଭଳି ଅଭିଯୋଗ ଆସିଛି ବୌଦ୍ଧ ଜିଲ୍ଲାର ବାଉଶୁଣୀ ଅଞ୍ଚଳରୁ ।
ତେବେ ଟାଟା ପାଓ୍ବାରର ବିଦ୍ୟୁତ ଦର ବୃଦ୍ଧି ଓ କର୍ମଚାରୀଙ୍କୁ ହଇରାଣ କରୁଥିବା ନେଇ ସବୁବେଳେ ଚର୍ଚ୍ଚା ଲାଗି ରହୁଛି । ଜିଲ୍ଲାର ବିଭିନ୍ନ ସ୍ଥାନରେ ଟାଟା କମ୍ପାନୀକୁ ବିଦ୍ୟୁତ ବିଭାଗ ହସ୍ତାନ୍ତର ପରେ ସାଧାରଣ ଉପଭୋକ୍ତା ଅତିଷ୍ଠ ହୋଇ ପଡିଛନ୍ତି । ବିଦ୍ୟୁତ ଦର ବୃଦ୍ଧି ସମସ୍ତଙ୍କୁ ଚିନ୍ତିତ କରିଥିବା ବେଳେ ବୌଦ୍ଧ ଜିଲ୍ଲାରେ ଆଜି ମଧ୍ୟ ଶତ ପ୍ରତିଶତ ଗ୍ରାମକୁ ବିଜୁଳି ସଂଯୋଗ ସାମାନ୍ୟ ହୋଇ ପାରିନାହିଁ । ଯେଉଁ ଦୁର୍ଗମ ଅଞ୍ଚଳରେ ଟ୍ରାନ୍ସଫର୍ମର ପୋଡ଼ି ଯାଉଛି କିମ୍ବା ଅନ୍ୟ କିଛି ସମସ୍ୟାରୁ ବିଦ୍ୟୁତ କାଟ ହେଉଛି ସେହି ଅଞ୍ଚଳର ଅଧିବାସୀ ମାସ ମାସ ଧରି ବିଦ୍ୟୁତ ସେବାରୁ ବଞ୍ଚିତ ହେଉଛନ୍ତି । ଏହାରି ମଧ୍ୟରେ ଜିଲ୍ଲାରେ ଟାଟା ପାଓ୍ବାରର କର୍ମଚାରୀଙ୍କ ପ୍ରତି ଅତ୍ୟାଚାର ହେଉଥିବା ଅଭିଯୋଗ ଆସିଛି ।
ବାଉଶୁଣୀ ଅଞ୍ଚଳରେ ଦୀର୍ଘ ବର୍ଷ ଧରି ବିଦ୍ୟୁତ ବିଭାଗରେ କାମ କରୁଥିବା ଜଣେ ସ୍ଥାୟୀ କର୍ମଚାରୀ ଗତ ୨୦୦୯ ମସିହାରେ କାର୍ଯ୍ୟ କରୁଥିବା ସମୟରେ ବିଦ୍ୟୁତ ସମ୍ପର୍କରେ ଆସି ମୃତ୍ୟୁବରଣ କରିଥିଲେ । ପରେ ମୃତକଙ୍କ ପୁଅକୁ ବିଦ୍ୟୁତ ବିଭାଗରେ ଅସ୍ଥାୟୀ ଚାକିରି ମିଳିଥିଲା । କିନ୍ତୁ ବର୍ତ୍ତମାନ ଉକ୍ତ ଯୁବକ ୧୩ ବର୍ଷ ଧରି କାମ କରିବାର ଦକ୍ଷତା ତଥା ବିଭାଗୀୟ ପରୀକ୍ଷାରେ କୃତକାର୍ଯ୍ୟ ହୋଇଥିବା ସତ୍ତ୍ଵେ ଟାଟା ପାଓ୍ବାର ଅଧିକାରୀମାନେ ତାଙ୍କୁ ପକ୍ଷପାତିତା କରୁଛନ୍ତି । ଏଥିସହ ଅନ୍ୟ କନିଷ୍ଠ କର୍ମଚାରୀଙ୍କୁ ଚୟନ କରୁଥିବା ନେଇ ଅଭିଯୋଗ ହୋଇଛି । ଏନେଇ ଯୁବକ ଜଣକ ବାରମ୍ବାର ଦୌଡ଼ିବା ସହିତ ଅଧିକାରୀଙ୍କ ଗୋଡ ତଳେ ପଡି ନେହୁରା ହେଲେ ମଧ୍ୟ ଏନେଇ କୌଣସି ସୁଫଳ ମିଳୁନାହିଁ ।