କିଏ ଶୁଣିବ ଦୁଃଖ ? ଖଟିଆ ଉପରେ ବିତୁଛି ଜୀବନ

ବୌଦ୍ଧ ଜିଲ୍ଲା ହରଭଙ୍ଗା ବ୍ଲକରେ ସାମାଜିକ ସୁରକ୍ଷା ବ୍ୟବସ୍ଥା ବାଟବଣା । ଖୋଲା ଆକାଶ ତଳେ ଖଣ୍ଡିଏ ଖଟରେ ଭୋକ ଉପାସରେ ଜୀବନ ବିତାଉଛନ୍ତି କମ୍ଭୁ ନାଏକ (80 ବର୍ଷ) ।

ବୌଦ୍ଧ: ଖୋଲା ଆକାଶ ତଳେ ଖଣ୍ଡିଏ ଖଟ । ଖଟିଆ ଉପରେ ଗୋଟିଏ ତମ୍ବୁ । ସେ ଭିତରେ 80 ବର୍ଷ ବୟସ୍କ ବୃଦ୍ଧ । ଚାଲିବାକୁ ଗୋଡ ବି ଉଠୁନି । ଘୋଷାରି ଘୋଷାରି କଟୁଛି ଜୀବନ । ନିଜର କହିଲେ ଦୁନିଆରେ କେହି ନାହିଁ । କିଏ ଦେଲେ ଖାଆନ୍ତି ତ ପୁଣି ଅଧାଦିନ ଭୋକ ଉପାସରେ । ଏଭଳି ଦୟନୀୟ ସ୍ଥିତିରେ ଭାଗ୍ୟକୁ ଆଦରି ବଞ୍ଚିଛନ୍ତି ବୌଦ୍ଧର ହରଭଙ୍ଗା ବ୍ଲକ ଅନ୍ତର୍ଗତ ପୀତାମ୍ବରପୁର ପଞ୍ଚାୟତର ଶରଧାପୁର ଗାଁର କମ୍ଭୁ ନାଏକ ।

ସହଯୋଗ ପାଇଁ ପଞ୍ଚାୟତର ସରକାରୀ ବାବୁଙ୍କୁ ଗୁହାରୀ କରିଲେ ବି କେହି ଶୁଣୁନାହାନ୍ତି । ଘର ଦୂରର କଥା ପଲିଥିନଟିଏ ବି ମିଳୁନି । ଏପଟେ ଆଧାର କାର୍ଡ ନଥିବାରୁ ମାସକୁ ମିଳୁଥିବା ଚାଉଳକୁ ବି ବନ୍ଦ କରିବାକୁ ବସିଛନ୍ତି ।

ଏନେଇ ହରଭଙ୍ଗା ବିଡିଓଙ୍କୁ ପଚାରିବାରୁ ସେ ସିଧାସଳଖ କହିଥିଲେ କି ତାର କେହି ନାହାନ୍ତି । ଘର ଯୋଗାଇଲେ କଣ କରିବ । ଏପରି ସ୍ଥିତିରେ ବଞ୍ଚିବାକୁ ସଂଘର୍ଷ କରୁଥିବା କମ୍‌ଭୁଙ୍କ କଷ୍ଟ କିଏ ବୁଝିବ ? କିପରି ଖରା ବର୍ଷ ଶୀତ ସହି ଖଟରେ ରହିବେ ସେ ? ଏଭଳି ଜଣେ ଅସହାୟ ବୃଦ୍ଧଙ୍କୁ ଖଣ୍ଡେ ପଲିଥିନ କିମ୍ବା ଚାଉଳ ମୁଠାଏ ନମିଳିବା ଆମ ବ୍ୟବସ୍ଥା ପ୍ରତି ବଡ ପ୍ରଶ୍ନବାଚୀ ସୃଷ୍ଟି କରିଛି ।

ବୌଦ୍ଧ ରୁ ସତ୍ୟ ନାରାୟଣ ପାଣି, ଈଟିଭି ଭାରତ