ଲୋକଙ୍କ ସମସ୍ୟା ପଚାରି ବୁଝିଲେ ବୌଦ୍ଧ ଜିଲ୍ଲାପାଳ, ବିଳମ୍ବିତ ରାତି ପର୍ଯ୍ୟନ୍ତ ଚାଲିଲା ଜନଶୁଣାଣୀ

ବୌଦ୍ଧ ପୌରାଞ୍ଚଳରେ ପ୍ରଥମଥର ପାଇଁ ରାତି ପର୍ଯ୍ୟନ୍ତ ହୋଇଥିଲା ଜିଲ୍ଲାପାଳଙ୍କ ଜନଶୁଣାଣୀ କାର୍ଯ୍ୟକ୍ରମ। ଅଧିକ ପଢନ୍ତୁ

ବୌଦ୍ଧ:ଜିଲ୍ଲାର ଏକମାତ୍ର ପୌରାଞ୍ଚଳ ବୌଦ୍ଧ ଗଡ ଏନଏସିରେ ପ୍ରଥମଥର ପାଇଁ ଜିଲ୍ଲାପାଳଙ୍କ ଯୁଗ୍ମ ଜନଶୁଣାଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଜିଲ୍ଲାପାଳ ସତ୍ୟ ରଞ୍ଜନ ସାହୁ ବିଭିନ୍ନ ଅଭିଯୋଗର ଶୁଣାଣୀ କରିବା ସହିତ ହିତାଧିକାରୀଙ୍କୁ ସରକାରୀ ସହାୟତା ଯୋଗାଇ ଦେଇଥିଲେ । ଅତିରିକ୍ତ ଜିଲ୍ଲାପାଳ, ଉପଜିଲ୍ଲାପାଳ, ନଗରପାଳ, ତହସିଲଦାରଙ୍କ ସମେତ ସମସ୍ତ ବିଭାଗୀୟ ଅଧିକାରୀ ଜନଶୁଣାଣୀରେ ସାମିଲ ହୋଇଥିଲେ । ପୌରାଞ୍ଚଳ ସମେତ ଜିଲ୍ଲାର ବିଭିନ୍ନ ସ୍ଥାନରୁ ବହୁ ହିତାଧିକାରୀ ଜିଲ୍ଲାପାଳଙ୍କ ନିକଟରେ ନିଜ ସମସ୍ୟା ସମ୍ପର୍କରେ ଅବଗତ କରାଇଥିଲେ । ବୌଦ୍ଧ ପୌରାଞ୍ଚଳରେ ପ୍ରଥମଥର ପାଇଁ ରାତି ପର୍ଯ୍ୟନ୍ତ ହୋଇଥିଲା ଜିଲ୍ଲାପାଳଙ୍କ ଜନଶୁଣାଣୀ କାର୍ଯ୍ୟକ୍ରମ ।

ପ୍ରଥମଥର ପାଇଁ ଜିଲ୍ଲାପାଳଙ୍କ ଅଭିଯୋଗ ଶୁଣାଣୀରେ ସମସ୍ତ ବ୍ୟାଙ୍କର ଅଧିକାରୀମାନେ ଯୋଗ ଦେଇଥିଲେ । ବୌଦ୍ଧ ସହରାଞ୍ଚଳର ବିଭିନ୍ନ ବସ୍ତିରେ ଆବାସ, ଜାଗା ମିଶନ, ରାସନ, ଚିକିତ୍ସା, ସାମାଜିକ ସୁରକ୍ଷା ଭଳି ସମସ୍ୟା ରହିଥିବା ବେଳେ 170 ଜଣ ହିତାଧିକାରୀ ଅଭିଯୋଗ ଶୁଣାଣୀ ପାଇଁ ପହଞ୍ଚି ଥିଲେ । ଜିଲ୍ଲା ପ୍ରଶାସନ ପକ୍ଷରୁ ରେଡକ୍ରସ ପାଣ୍ଠିରୁ ବାର ଜଣ ହିତାଧିକାରୀଙ୍କୁ 71 ହଜାର ଟଙ୍କା ଓ ଆଉ ବାର ଜଣ ହିତାଧିକାରୀଙ୍କୁ ମୁଖ୍ୟମନ୍ତ୍ରୀ ସହାୟତା ପାଣ୍ଠିରୁ ଏକ ଲକ୍ଷ ପନ୍ଦର ହଜାର ଟଙ୍କାର ସହାୟତା ରାଶି ପ୍ରଦାନ କରାଯାଇଥିଲା ।

ଜିଲ୍ଲା ପ୍ରଶାସନ ପକ୍ଷରୁ ସଧ୍ୟା ସମୟ ଜନଶୁଣାଣୀ କାର୍ଯ୍ୟକ୍ରମ ପ୍ରଥମଥର ପାଇଁ ଅନୁଷ୍ଠିତ ହୋଇଥିବା ବେଳେ ହିତାଧିକାରୀ ମାନେ ଉତ୍ସାହର ସହିତ ପୌର କାର୍ଯ୍ୟାଳୟରେ ପହଞ୍ଚି ଥିଲେ । ତେବେ ଅଭିଯୋଗ ଶୁଣାଣୀ ପୌର ଅଫିସର ଉପର ମହଲାରେ ଅନୁଷ୍ଠିତ ହୋଇଥିବାରୁ ଅନେକ ଦିବ୍ୟାଙ୍ଗ, ବୃକ୍ଷ ବୃଦ୍ଧା ମାନେ ପାହାଚ ଚଢି ଉପରକୁ ପହଞ୍ଚିବାରେ କଷ୍ଟକର ହୋଇଥିଲା । ନିଜ ଭତ୍ତା ଟଙ୍କା ସମସ୍ୟା ସମ୍ପର୍କରେ ଜିଲ୍ଲାପାଳଙ୍କୁ ଗୁହାରୀ ଜଣାଇବାକୁ ଜଣେ 85 ବର୍ଷ ବୟସ୍କା ବୃଦ୍ଧା ଖାଲି ପାଦରେ ଚାଲି ଚାଲି ପାହାଚ ଚଢି ଗୁହାରୀ ଜଣାଇଥିଲେ । ତେବେ ଅନେକ ଗରିବ, ଅସହାୟଙ୍କୁ ଜିଲ୍ଲାପାଳ ସରକାରୀ ସହାୟତା ଯୋଗାଇ ଦେଇଥିବାରୁ ହିତାଧିକାରୀମାନେ ଖୁସି ପ୍ରକାଶ କରିଛନ୍ତି । ଏହି କାର୍ଯ୍ୟକ୍ରମରେ ଜିଲ୍ଲାପାଳଙ୍କ ସହ ଅତିରିକ୍ତ ଜିଲ୍ଲାପାଳ, ଉପଜିଲ୍ଲାପାଳ, ନଗରପାଳ, ତହସିଲଦାରଙ୍କ ସମେତ ସମସ୍ତ ବିଭାଗୀୟ ଅଧିକାରୀ ସାମିଲ ହୋଇଥିଲେ ।

ଇଟିଭି ଭାରତ, ବୌଦ୍ଧ