ଶଙ୍କୁଳେଇ ଧାନମଣ୍ଡିରେ ଅଚଳାବସ୍ଥା, ଚାଷୀ ହନ୍ତସନ୍ତ

ଶଙ୍କୁଳେଇ ମଣ୍ଡିରେ ଲାଗି ରହିଛି ଅଚଳାବସ୍ଥା । ଦୀର୍ଘ ଦିନ ଧରି ଖୋଲା ଆକାଶ ତଳେ ଶୀତ କାକରରେ ଚାଷୀ ଧାନକୁ ଜଗିବା ଛଡା ଅନ୍ୟ ଉପାୟ ନଥିବା ଅଭିଯୋଗ କରିଛନ୍ତି ।

ବୌଦ୍ଧ: ଜିଲ୍ଲାର ବିଭିନ୍ନ ଧାନ ମଣ୍ଡିରେ ବର୍ତ୍ତମାନ ଅଚଳାବସ୍ଥା ଦେଖାଦେଇଛି। ଧାନର ମାନ ସଠିକ ନଥିବା ଦର୍ଶାଯାଇ ଚାଷୀଙ୍କୁ ଉପଯୁକ୍ତ ମୂଲ୍ୟ ମିଳୁନଥିବା ବେଳେ ମିଲର୍ସ ଗାଡି ଆସୁ ନଥିବାରୁ ଚାଷୀ ବାଧ୍ୟ ହୋଇ ଏକାଧିକ ଦିନ ଖୋଲା ଆକାଶ ତଳେ ଶୀତ କାକରରେ ପଡି ରହୁଥିବା ଦେଖିବାକୁ ମିଳିଛି । ଏଭଳି ଦୃଶ୍ୟ ଦେଖିବାକୁ ମିଳିଛି ହରଭଙ୍ଗା ବ୍ଲକ ଶଙ୍କୁଳେଇ ମଣ୍ଡିରେ ।

ଚାଷୀ ମାନେ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁ ନଥିବାରୁ ସେମାନେ ପ୍ରଶାସନକୁ ଦାୟୀ କରିଛନ୍ତି । ଏପଟେ ଶଙ୍କୁଳେଇ ସମବାୟ ସମିତିର ନିଜସ୍ବ କାର୍ଯ୍ୟାଳୟ ଗୃହ ମଧ୍ୟ ଏକ ଭଙ୍ଗା ଘରେ ଚାଲିଥିବା ବେଳେ ଧାନ ବସ୍ତା ମଧ୍ୟ ଖୋଲା ଆକାଶ ତଳେ ପଡିରହୁଛି । ଏନେଇ ପ୍ରଶାସନ ଦୃଷ୍ଟି ଦେଇ ଚାଷୀଙ୍କ ସମସ୍ୟା ଦୂର କରିବାକୁ ଚାଷୀମାନେ ଦାବି କରିଛନ୍ତି।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ