ବୌଦ୍ଧ: ପଞ୍ଚୁକ ବ୍ରତ ଉପଲକ୍ଷେ ଚଳଚଞ୍ଚଳ ଦେବାଦେବୀଙ୍କ ପୀଠ । ପୁଣ୍ୟ ମାସ କାର୍ତ୍ତିକ ଶେଷ ସୋପାନରେ । ପଞ୍ଚୁକ ପାଇଁ ଜିଲ୍ଲାର ବିଭିନ୍ନ ସ୍ଥାନରେ ଆଧ୍ୟାତ୍ମିକ କାର୍ଯ୍ୟକ୍ରମର ଅସରା । ଶ୍ରୀଜଗନ୍ନାଥ ମହାପ୍ରଭୁଙ୍କ ପଞ୍ଚପଲ୍ଲବ ବେଶ ଅନୁଷ୍ଠିତ । ଚତୁର୍ଦ୍ଦଶୀ ଅବସରରେ ପ୍ରବଚନ, ନାମ ସଙ୍କୀର୍ତ୍ତନ ସାଙ୍ଗକୁ କଳାକୁଞ୍ଜର ଆୟୋଜନ । ସଂଧ୍ୟାରେ ମହାନଦୀରେ ମହାଆଳତୀ ।
ପୁଣ୍ୟ ମାସ କାର୍ତ୍ତିକ ଶେଷ ସୋପାନରେ ପହଞ୍ଚିଛି । ଆଉ କାର୍ତ୍ତିକ ମାସର ପଞ୍ଚୁକ ଉପଲକ୍ଷେ ଜିଲ୍ଲାର ବିଭିନ୍ନ ଦେବାଦେବୀଙ୍କ ପୀଠରେ ଭକ୍ତ ଓ ଶ୍ରଦ୍ଧାଳୁଙ୍କ ଭିଡ଼ ପରିଲକ୍ଷିତ ହୋଇଥିଲା । ଆଜି ଚତୁର୍ଦଶୀ ପାଇଁ ଶ୍ରୀଜଗନ୍ନାଥ ମନ୍ଦିରରେ ସ୍ବତନ୍ତ୍ର ନୀତିକାନ୍ତି ସହିତ ବେଶ ଦର୍ଶନ ବ୍ୟବସ୍ଥା କରାଯାଇଥିଲା । ପବିତ୍ର କାର୍ତ୍ତିକ ମାସର ପଞ୍ଚୁକ ଉପଲକ୍ଷେ ଜିଲ୍ଲାର ବିଭିନ୍ନ ସ୍ଥାନରେ ଥିବା ଦେବାଦେବୀଙ୍କ ପୀଠରେ ଭକ୍ତ ଓ ଶ୍ରଦ୍ଧାଳୁମାନେ ନିଷ୍ଠା ସହିତ ବ୍ରତ ପାଳନ କରିଛନ୍ତି । ପଞ୍ଚୁକ ବ୍ରତ ପାଇଁ ବୌଦ୍ଧ ଜିଲ୍ଲାର ଗନ୍ଧରାଡ଼ିର ହରିହର ମନ୍ଦିର, ରାମେଶ୍ବର ମନ୍ଦିର ସମେତ ଶ୍ରୀଜଗନ୍ନାଥ ମନ୍ଦିର ଓ ଚନ୍ଦ୍ରଚୂଡ ମନ୍ଦିର ଆଳତୀ ଘାଟ ଠାରେ ସ୍ବତନ୍ତ୍ର ପୂଜାପାଠର ଆୟୋଜନ କରାଯାଇଥିଲା । ବିଶେଷ ଭାବରେ ହବିଷ୍ୟାଳି ବ୍ରତ ପାଳନ କରୁଥିବା ମହିଳା ଶ୍ରଦ୍ଧାଳୁମାନେ ସକାଳୁ ଓ ସଂଧ୍ୟାରେ ତୁଳସୀ ଚଉରା ମୂଳରେ ସ୍ବତନ୍ତ୍ର ଭାବରେ ପୂଜାର୍ଚ୍ଚନା କରିଥିଲେ ।