ବୌଦ୍ଧ: ପରିଣତ ବୟସରେ ଅସହାୟ ଝରି ମେହେର । ନା ଅଛନ୍ତି ସ୍ବାମୀ, ପିଲା ନା କେହି ସମ୍ପର୍କୀୟ । ଝରି ଏବେ ଏକାକି ଅତି ଦୟନୀୟ ଅବସ୍ଥାରେ କାଳ କାଟୁଛନ୍ତି ।
ବୌଦ୍ଧ ଜିଲ୍ଲା ଲକ୍ଷ୍ମୀ ପ୍ରସାଦ ପଞ୍ଚାୟତର ନାରାୟଣ ନଗର ଗ୍ରାମରେ ବାସ କରନ୍ତି ଝରି ମେହେର । ବୟସ 70ରୁ ଊର୍ଦ୍ଧ୍ବ ହୋଇ ସାରିଥିବାରୁ ଆଖିକୁ ଠିକ୍ରେ ଦେଖା ମଧ୍ୟ ଯାଉନାହିଁ । ତେବେ ଏତିକିରେ ସରିନି ତାଙ୍କ ଦୁଃଖ ।
ଦୁଇ ଡେସିମିଲରେ ନିଜର ଏକ ମାତ୍ର ଘର ଥିଲା । ହେଲେ ଲଗାଣ ବର୍ଷାରେ ସେ ମଧ୍ୟ ଭାଙ୍ଗି ଗଲା । ତେଣୁ ଏବେ ପର ପିଣ୍ଡାରେ ଜୀବନ କଟୁଛି । କେହି ଯଦି ଦୟାକରି ତାଙ୍କୁ ମୁଠାଏ ଖାଇବାକୁ ଦେଉଛି ତେବେ ସେ ଖାଉଛନ୍ତି ନଚେତ ଉପାସ ରହିବା ନିଶ୍ଚିତ ।
ଏନେଇ ସ୍ଥାନୀୟ ପଞ୍ଚାୟତ ଅଧିକାରୀଙ୍କୁ ଜଣାଇବାରୁ ସେ ଝରିଙ୍କୁ କିଛି ସରକାରୀ ସହାୟତା ଦିଆଯାଇଥିଲେ ମଧ୍ୟ ଘର ଖଣ୍ଡେ ଯୋଗାଇ ଦିଆଯାଇ ନଥିବା ସ୍ବୀକାର କରିଛନ୍ତି । ଏହାସହ ଆଗାମୀ ଦିନରେ ତାଙ୍କୁ ଘର ଖଣ୍ଡେ ପ୍ରଦାନ କରାଯିବ ବୋଲି ସେ ପ୍ରତିଶୃତି ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ