ବୌଦ୍ଧ:ସରକାରୀ ଅର୍ଥର ହେଉଥିଲା ବାଟମାରଣା । କାଗଜପତ୍ରରେ ଉନ୍ନତି ନାଁରେ ଲକ୍ଷାଧିକ ଟଙ୍କା ଖର୍ଚ୍ଚ ଦର୍ଶାଇ କରାଯାଉଥିଲା ହରିଲୁଟ୍ । ବୌଦ୍ଧ ସଦର ବ୍ଲକ୍ରେ ଏଭଳି ଦୁର୍ନୀତିର ଆଜି ପର୍ଦ୍ଦାଫାଶ କରିଛନ୍ତି ନବନିର୍ବାଚିତ ବ୍ଲକ ଅଧ୍ୟକ୍ଷ ପ୍ରିୟଦର୍ଶୀ ପ୍ରତ୍ୟୁଷ ରଥ । ଆଜି ଅଚାନକ ବାଉଁଶୁଣୀ ପଞ୍ଚାୟତରେ ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିବାକୁ ପହଞ୍ଚିଥିଲେ ନବ ନିର୍ବାଚିତ ବ୍ଲକ ଅଧ୍ୟକ୍ଷ ।
ବାଉଁଶୁଣୀ ପଞ୍ଚାୟତରେ ଦୁର୍ନୀତିର ପର୍ଦ୍ଦାଫାସ କଲେ ବ୍ଲକ ଅଧ୍ୟକ୍ଷ
ଏହି ସମୟରେ ତାଙ୍କ ସହ ବିଡିଓ, ଯନ୍ତ୍ରୀ, ସ୍ଥାନୀୟ ଜିଲ୍ଲା ପରିଷଦ ସଭ୍ୟ, ସରପଞ୍ଚ, ସମିତି ସଭ୍ୟ ଉପସ୍ଥିତ ରହିଥିଲେ । ଏହିକ୍ରମରେ ବ୍ଲକ ଅଧ୍ୟକ୍ଷ ପ୍ରଥମେ ବାଉଁଶୁଣୀ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ସ୍ଥିତି ଯାଞ୍ଚ କରିଥିଲେ । ତେବେ ଏଠାରେ ପାନୀୟ ଜଳ ପ୍ରକଳ୍ପରେ ବ୍ୟାପକ ଦୁର୍ନୀତି ହୋଇଥିବା ଜଣା ପଡ଼ିଥିଲା । ଖାଲି ସେତିକି ନୁହେଁ ବାଉଶୁଣୀ ପଞ୍ଚାୟତରେ ବିଶ୍ରାମ ଗୃହ, ଅଚଳ ଜେନେରେଟର, ପରିମଳ ଓ ଅନ୍ୟାନ୍ୟ ଉନ୍ନୟନ କାର୍ଯ୍ୟରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି ।