ବୌଦ୍ଧ: ଦୁଗ୍ଧ ଉତ୍ପାଦନ ବୃଦ୍ଧି ପାଇଁ ସରକାର ବିଭିନ୍ନ ଯୋଜନା କରିବା ସହ ଏନେଇ ଚାଷୀଙ୍କୁ ପ୍ରୋତ୍ସାହନ ଯୋଗାଇ ଦେଉଛନ୍ତି । କିନ୍ତୁ ଅଧିକ କ୍ଷୀର ଉତ୍ପାଦନ ପରେ ବିକ୍ରି ପାଇଁ ଉପୁଜିଛି ଅଡୁଆ । ଏନେଇ ଗୋପାଳକ ଓ ଦୁଗ୍ଧ ଚାଷୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି ।
ଆଜି(ଶନିବାର) ବୌଦ୍ଧ ଜିଲ୍ଲା ଜହ୍ନାପଙ୍କ ଠାରେ ଥିବା ଚାରିଶମ୍ଭୁ ଦୁଗ୍ଧ ଉତ୍ପାଦନ ସମିତିର ଦୁଗ୍ଧ ଚାଷୀମାନେ କ୍ଷୀର ବିକ୍ରି କରିନପାରି ଶେଷରେ 57 ନମ୍ବର ଜାତୀୟ ରାଜପଥକୁ ଅବରୋଧ କରିବା ସହ ରାସ୍ତାରେ କ୍ଷୀର ଢାଳିଥିବା ଦେଖିବାକୁ ମିଳିଛି । ଦୀର୍ଘ ଦିନ ହେବ ଏଠାରେ ପ୍ରାଣୀଧନ ବିଭାଗର ପରାମର୍ଶ କ୍ରମେ ଚାଷୀ, କ୍ଷୀର ଉତ୍ପାଦନ ବୃଦ୍ଧି କରିବା ସହ କ୍ଷୀର ବିକ୍ରି ପାଇଁ ବିଭାଗକୁ ଅନୁରୋଧ କରିଆସୁଥିଲେ ।
କିନ୍ତୁ ବିଭାଗର ଟାଳଟୁଳ ନୀତି ପାଇଁ ଶେଷରେ ଉତ୍ତ୍ୟକ୍ତ ଚାଷୀମାନେ ଜହ୍ନାପଙ୍କ ଠାରେ ଜାତୀୟ ରାଜପଥ ଅବରୋଧ କରିବା ସହ ସମସ୍ତ କ୍ଷୀର ରାସ୍ତାରେ ଢାଳି ଅଭିନବ ପ୍ରତିବାଦ ଜଣାଇଥିଲେ । ତୁରନ୍ତ ଏଦିଗରେ ପ୍ରଶାସନ ପଦକ୍ଷେପ ଗ୍ରହଣ ନକଲେ ଆଗାମୀ ଦିନରେ ଚାଷୀ ଆନ୍ଦୋଳନକୁ ଯୋରଦାର କରିବ ବୋଲି ଚେତାବନୀ ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ