ଉତ୍ସାହର ସହ ରମଜାନ ପାଳୁଛନ୍ତି ବୌଦ୍ଧର ମୁସଲମାନ ଭାଇଭଉଣୀ

ନିର୍ଜଳ ଉପବାସ ରହି ନିଷ୍ଠାର ସହ ରମଜାନ ପାଳୁଛନ୍ତି ବୌଦ୍ଧର ମୁସଲମାନ ସଂପ୍ରଦାୟର ଭାଇ ଭଉଣୀମାନେ ।

ବୌଦ୍ଧ: ଇସଲାମିକ ଧର୍ମର ସବୁଠୁ ପବିତ୍ର ମାସ ରମଜାନ । ଏହି ମାସରେ ମୁସଲମାନ ସଂପ୍ରଦାୟର ଭାଇ ଭଉଣୀମାନେ ରୋଜା ବା ବ୍ରତ ରଖିଥାନ୍ତି । ସୂର୍ଯ୍ୟୋଦୟ ପୂର୍ବରୁ ଉଠି ଗାଧୋଇ ପୂଜା କରି ଖାଦ୍ୟ ଗ୍ରହଣ କରିଥାନ୍ତି ଆଉ ସାରା ଦିନ ନିର୍ଜଳ ଉପବାସ କରିଥାନ୍ତି । ତେବେ ଆଉ ଦୁଇ ଦିନ ପରେ ଚନ୍ଦ୍ର ଦର୍ଶନ କରିବା ପରେ ଉଦଯାପିତ ହେବ ପବିତ୍ର ରମଜାନ ।

ତେବେ ରମଜାନ ମାସ ସରି ଆସୁଥିବାବେଳେ ଚଳଚଞ୍ଚଳ ହୋଇ ଉଠିଛି ବୌଦ୍ଧ ଜିଲ୍ଲାର ବିଭିନ୍ନ ମସଜିଦ । ଆନନ୍ଦ ଓ ଶ୍ରଦ୍ଧାର ସହ ମୁସଲମାନ ଭାଇଭଉଣୀ ମାନେ ରୋଜା ରଖି ପାଳନ କରୁଛନ୍ତି ରମଜାନ ପର୍ବ ।

ଜିଲ୍ଲାର ମୁସଲମାନପଡା, ଖଦାଳ ସାହି ଓ ମନମୁଣ୍ଡାରେ ରହିଛି ତିନୋଟି ମସଜିଦ । ଏହି ତିନୋଟି ମସଜିଦରେ ମୁସଲମାନ ପୁରୁଷମାନେ ଦିନ ସାରା ରୋଜା ବା ଉପବାସ ରହି ସଂଧ୍ୟାରେ ନମାଜ ପାଠ କରି ଖାଦ୍ୟ ଗ୍ରହଣ କରୁଛନ୍ତି । ସେହିପରି ମହିଳାମାନେ ମଧ୍ୟ ନିଜନିଜ ଘରେ ଆନନ୍ଦ ଓ ଶ୍ରଦ୍ଧାର ସହ ରୋଜା ରଖି ରମଜାନ ପାଳନ କରୁଛନ୍ତି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ