ବୌଦ୍ଧ: ଷ୍ଟୋନ କ୍ରସର ଆନ୍ଦୋଳନକୁ ନେଇ ଦିନକୁ ଦିନ ପରିସ୍ଥିତି ଜଟିଳ ହେବାରେ ଲାଗିଛି । କ୍ରସର ବନ୍ଦ ଯୋଗୁଁ ଉନ୍ନୟନ କାର୍ଯ୍ୟରେ ବାଧାପ୍ରାପ୍ତ ହେଉଛି । ତେଣୁ ପରିବେଶ ତଥା ସ୍ଥାନୀୟ ଅଞ୍ଚଳରେ ଜୀବନ ଜୀବିକାକୁ ଦୃଷ୍ଟିରେ ରଖି ପ୍ରଶାସନ ପଦକ୍ଷେପ ଗ୍ରହଣ ପାଇଁ ମତ ପ୍ରକାଶ ପାଇଛି ।
ବୌଦ୍ଧ ଜିଲ୍ଲା ହରଭଙ୍ଗା ତହସିଲ ଅନ୍ତର୍ଗତ ଖରଭୁଇଁ ଠାରେ ଚାଲିଥିବା କ୍ରସର ବିରୋଧ ଆନ୍ଦୋଳନ ଇତି ମଧ୍ୟରେ ୧୬ଦିନ ବିତିଗଲାଣି । ଷ୍ଟୋନ କ୍ରସର ପୁନଃ କାର୍ଯ୍ୟକ୍ଷମ ବିରୋଧରେ ଆନ୍ଦୋଳନ ଦିନକୁ ଦିନ ଭିନ୍ନ ଭିନ୍ନ ମୋଡ ନେଉଛି । କିନ୍ତୁ ପ୍ରଶାସନ ଓ ଆନ୍ଦୋଳନକାରୀଙ୍କ ମଧ୍ୟରେ ଆଲୋଚନା ବାରମ୍ବାର ବିଫଳ ହେବା ସହିତ ଛକା ପଞ୍ଜା ଲାଗିରହିଛି ।
ଥମୁନି ଷ୍ଟୋନ କ୍ରସର ବିରୋଧ ଆନ୍ଦୋଳନ, ପଦକ୍ଷେପ ଉପରେ ସମସ୍ତଙ୍କ ନଜର ଗତ ମଙ୍ଗଳବାର ଦିନ ଏହି କ୍ରସର ଆନ୍ଦୋଳନ ସହ ଜଡ଼ିତ ତଥା ପୂର୍ବତନ ଜିଲ୍ଲା ପରିଷଦ ସଭ୍ୟ ଅବକାଶ ସାହୁଙ୍କୁ ବୌଦ୍ଧ ପୋଲିସ ଆଢେଣୀଗଡ ଫାଣ୍ଡି ଅଞ୍ଚଳରୁ ହଠାତ ଗିରଫ କରିଛି । ପରେ ଏହାକୁ ନେଇ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ପ୍ରଶାସନ ଏହାଦ୍ବାରା କ୍ରସର ବିରୋଧ ଆନ୍ଦୋଳନକୁ ଚପାଇ ଦେବାର ଚେଷ୍ଟା କରୁଥିବା ବେଳେ ଏହି ଆନ୍ଦୋଳନ ଆହୁରି ଉଗ୍ର ରୂପ ନେବାର ଆଶଙ୍କା ସୃଷ୍ଟି ହୋଇଛି ।
ଏହାମଧ୍ୟ ପଢ଼ନ୍ତୁ.ଖରଭୂଇଁ ଷ୍ଟୋନ କ୍ରସରକୁ ନେଇ ଆରୋପ ପ୍ରତ୍ୟାରୋପ
ଜିଲ୍ଲାର ଅନ୍ୟ ଦୁଇଟି ବ୍ଲକ କଣ୍ଟାମାଳ ଓ ବୌଦ୍ଧ ବ୍ଲକରେ କ୍ରସର ସବୁ ଠିକରେ ଚାଲୁଥିବା ବେଳେ ଖରଭୁଇଁ ଅଞ୍ଚଳରେ କ୍ରସର ବିରୋଧ ଆନ୍ଦୋଳନକୁ ନେଇ ମଧ୍ୟ ନାନା ଚର୍ଚ୍ଚା ଲାଗିରହିଛି । ଏକ ନିର୍ଦ୍ଦିଷ୍ଟ କ୍ରସର ସଂସ୍ଥା ବର୍ତ୍ତମାନ ଜିଲ୍ଲାରେ କାର୍ଯ୍ୟ ହେଉଥିବା ଖୋର୍ଦ୍ଧା ବଲାଙ୍ଗୀର ରେଳପଥ ନିମନ୍ତେ ମେଟାଲ ଚିପ୍ସ ଯୋଗାଇବା ପାଇଁ ଏଭଳି ଏକ ପୃଷ୍ଠଭୂମି ପ୍ରସ୍ତୁତ କରାଯାଇଥିବା ଜଣାପଡିଛି । ଏହାପଛରେ ଏକ ବଡ଼ଧରଣର ଷଡଯନ୍ତ୍ର ସୃଷ୍ଟି କରାଯାଇ କୋଟି କୋଟି ଟଙ୍କାର ବ୍ୟବସାୟ ପାଇଁ ନିରୀହ ଖରଭୁଇଁ ଗ୍ରାମବାସୀ ଓ ପ୍ରଶାସନ ମଧ୍ୟରେ ଏକ ଅଦୃଶ୍ୟ ଲଢେଇ କରାଯାଉଥିବା ନେଇ ମଧ୍ୟ ଚର୍ଚ୍ଚା ଯୋର ଧରିଛି । ତେବେ ମଙ୍ଗଳବାର ଶ୍ରମିକ ନେତା ଅବକାଶ ସାହୁଙ୍କୁ ଗିରଫ ପରେ ଖରଭୁଇଁ ଆନ୍ଦୋଳନ ସ୍ଥାନରେ ଗ୍ରାମବାସୀ ଦିନରାତି ଶୀତ କାକରରେ ଆନ୍ଦୋଳନ ଜାରି ରଖି ରାସ୍ତା ଅବରୋଧ କରିଛନ୍ତି ।
ଗୋଟିଏ ପଟରେ କ୍ରସର ବନ୍ଦ ଯୋଗୁଁ ଜିଲ୍ଲାର ଉନ୍ନୟନ କାର୍ଯ୍ୟ ଓ ରାଜସ୍ୱ ହାନୀ ହେଉଥିବା ବେଳେ ଅନ୍ୟ ପଟରେ ପରିବେଶ ପ୍ରଦୂଷଣ ଓ ଖରଭୁଇଁ ଗ୍ରାମବାସୀଙ୍କ ଜୀବନ ଜୀବିକା ପ୍ରଭାବିତ ହେଉଛି । ଉଭୟ ପକ୍ଷକୁ ଦୃଷ୍ଟିରେ ରଖି ବୌଦ୍ଧ ଜିଲ୍ଲା ପ୍ରଶାସନ ଉପଯୁକ୍ତ ପଦକ୍ଷେପ ଗ୍ରହଣ ପାଇଁ ବୁଦ୍ଧିଜୀବୀ ମତ ପ୍ରକାଶ ପାଇଛି ।
ଇଟିଭି ଭାରତ, ବୌଦ୍ଧ
