ବୌଦ୍ଧ: ଜିଲ୍ଲାର ବିଭିନ୍ନ ପଞ୍ଚାୟତରେ ମନରେଗା ଦୁର୍ନୀତି ଚରମରେ ପହଞ୍ଚିଥିବା ଅଭିଯୋଗ । ରାସନ ଠାରୁ ଭତ୍ତା ପର୍ଯ୍ୟନ୍ତ, ସର୍ବୋପରି ଆବାସ ଯୋଜନାରେ ଦୁର୍ନୀତି ଯୋଗୁଁ ପ୍ରକୃତ ହିତାଧିକାରୀ ଏସବୁ କଲ୍ୟାଣକାରୀ ଯୋଜନାରୁ ବାଦ ପଡୁଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ । ପଞ୍ଚାୟତରେ ମନରେଗା ଯୋଜନାରେ ମନମାନୀ ଚାଲିଥିବାରୁ ଅସନ୍ତୁଷ୍ଟ ସାଧାରଣ ଲୋକେ ।
ବୌଦ୍ଧରେ ସରକାରଙ୍କ ବିଭିନ୍ନ ଯୋଜନାରେ ବ୍ୟାପକ ଦୁର୍ନୀତି ଅଭିଯୋଗ ବୌଦ୍ଧ ଜିଲ୍ଲାର କେତେକ ପଞ୍ଚାୟତରେ ମନରେଗା ଯୋଜନାରେ ଦୁର୍ନୀତିର ଚେର ପଞ୍ଚାୟତ ଠାରୁ ନେଇ ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ଲମ୍ବିଛି । ହରଭଙ୍ଗା ବ୍ଲକ ଧଳପୁର ପଞ୍ଚାୟତରେ ଦୁର୍ନୀତି ଚରମରେ ପହଞ୍ଚିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ମାସ କେଇଟାରେ ନୂତନ ଦାୟିତ୍ୱ ଗ୍ରହଣ କରିଥିବା ପଞ୍ଚାୟତ ପ୍ରତିନିଧିମାନେ ବିଭିନ୍ନ ଦଲାଲଙ୍କ ସହାୟତାରେ ଜେସିବି ମେସିନ ଓ ଟ୍ରାକ୍ଟର ଦ୍ବାରା ବିଭିନ୍ନ ରାସ୍ତା କାମ ଓ ପୋଖରୀ ଖନନ କାର୍ଯ୍ୟ କଲେ । ବର୍ତ୍ତମାନ ଉକ୍ତ ରାସ୍ତାର ଅବସ୍ଥା ବେହାଲ ହୋଇପଡି ଥିବାବେଳେ ପୋଖରୀରେ ପାଣି ଠିକ୍ରେ ରହୁନାହିଁ । କେବଳ ଲକ୍ଷ ଲକ୍ଷ ଧୂଳିସାତ୍ ହେଉଥିବା ଅଭିଯୋଗ ହୋଇଛି ।
ଏପରିକି ପଞ୍ଚାୟତ କାର୍ଯ୍ୟାଳୟକୁ ସଂଯୋଗ କରୁଥିବା ରାସ୍ତା ମଧ୍ୟ ଦୁର୍ବିସହ ହୋଇପଡିଛି । ସେହିପରି ପଞ୍ଚାୟତରେ ରାସନ କାର୍ଡ, ଭତ୍ତା ଓ ଆବାସ ଯୋଜନାର ସୁଫଳ ପ୍ରକୃତ ହିତାଧିକାରୀ ପାଇପାରୁ ନଥିବା ଅଭିଯୋଗ ହୋଇଛି । ତୁରନ୍ତ ଏନେଇ ଜିଲ୍ଲା ପ୍ରଶାସନ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ ପାଇଁ ଦାବି କରିଛନ୍ତି ହିତାଧିକାରୀ ।
ଇଟିଭି ଭାରତ, ବୌଦ୍ଧ
