ବୌଦ୍ଧ: ଚୋରା ଗଞ୍ଜେଇ ମାଫିଆଙ୍କ ଚରାଭୂଇଁ ପାଲଟିଛି ବୌଦ୍ଧ ଜିଲ୍ଲା । ଜିଲ୍ଲାର ବିଭିନ୍ନ ଅଞ୍ଚଳରୁ ପ୍ରତ୍ୟେକ ଦିନ ଶହ ଶହ କ୍ବିଣ୍ଟାଲ ଗଞ୍ଜେଇ ରାଜ୍ୟ ତଥା ରାଜ୍ୟ ବାହାରକୁ ଚୋରା ଚାଲାଣ ହୋଇଆସୁଛି । ତେବେ ବୌଦ୍ଧର ନୂତନ ଏସପି ଭାବରେ ଜ୍ଞାନ ରଞ୍ଜନ ମହାନ୍ତି କାର୍ଯ୍ୟରେ ଯୋଗ ଦେବା ପରେ ଗତ ମାସକ ମଧ୍ୟରେ ବ୍ୟାପକ ଚଢାଉ କରାଯାଇଥିଲା । ଯେଉଁଥିରେ ଶହ ଶହ କ୍ବିଣ୍ଟାଲ ଗଞ୍ଜେଇ ସହ ଅନେକ ଅଭିଯୁକ୍ତଙ୍କୁ ଗିରଫ କରାଯାଇ ପାରିଛି ।
ତେବେ ପୂର୍ବରୁ ଅନେକ ଥର ଏହି ଜବତ ଗଞ୍ଜେଇର ପରିମାଣକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଆସୁଥିବା ବେଳେ ପ୍ରକୃତ ଗଞ୍ଜେଇ ମାଫିଆକୁ ପୋଲିସ ଧରିବାରେ ଅସମର୍ଥ ହେଉଥିବା ଚର୍ଚ୍ଚା ହେଉଛି । ଜିଲ୍ଲାର ଗଞ୍ଜେଇ କାରବାରକୁ ନେଇ ଚଳିତ ବର୍ଷ ଏସଟିଏଫ ମଧ୍ୟ ଅନେକ ଥର ଚଢାଉ କରି ବେଆଇନ ଚାଲାଣକୁ ରୋକିବାରେ ସମର୍ଥ ହୋଇଛି ।
ସେପଟେ ଗତକାଲି ଅବକାରୀ ବିଭାଗ ବୌଦ୍ଧ କନ୍ଧମାଳ ସୀମାନ୍ତରେ ଚଢ଼ାଉ କରି ଏକ ସ୍କର୍ପିଓ ଗାଡିରୁ 21 କେଜି ଗଞ୍ଜେଇ ସହ ୩ ଜଣଙ୍କୁ ଗିରଫ କରାଯାଇଛି । ତେବେ ସବୁଠାରୁ ଆଶ୍ଚର୍ଯ୍ୟର କଥା ତନ୍ମଧ୍ୟରୁ ଜଣେ ଅଭିଯୁକ୍ତଙ୍କ ପତ୍ନୀ ବୌଦ୍ଧ ଥାନାରେ ଜଣେ ହୋମଗାର୍ଡ ଭାବରେ କାର୍ଯ୍ୟ କରୁଥିବା ନେଇ ଖୋଦ ଅବକାରୀ ଅଧିକ୍ଷକ ଇଟିଭି ଭାରତକୁ ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
