ବୌଦ୍ଧ: ବାଦଲଫଟା ବର୍ଷାରେ ବେହାଲ ସାରା ଜିଲ୍ଲା । ପ୍ରବଳରୁ ଅତି ପ୍ରବଳ ବର୍ଷା ଯୋଗୁଁ ବୌଦ୍ଧ ଜିଲ୍ଲାର ବିଭିନ୍ନ ରାସ୍ତା ଉପରେ ବନ୍ୟା ପାଣି ପ୍ରବାହିତ ହୋଇ ଯୋଗାଯୋଗ ବିଚ୍ଛିନ୍ନ ହୋଇ ପଡିଛି ।
ବୌଦ୍ଧ ଜିଲ୍ଲାର ନାରାୟଣପୁର, କମିରା, ଖମାରୀପଡା, ବାଘପାଲି ଭଳି କୋଡିଏରୁ ଊର୍ଦ୍ଧ୍ବ ଗ୍ରାମକୁ ଯୋଗାଯୋଗ ବିଚ୍ଛିନ୍ନ ହୋଇଥିବା ବେଳେ ସାତକୋଶିଆ ଅଭୟାରଣ୍ୟ ମଧ୍ୟରେ ଥିବା ମାରଡା ଓ ଗେରେଡିସାହି ଭଳି ଗ୍ରାମ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡିଛି ।
ଅନେକ ସ୍ଥାନରେ ଗରିବ ଲୋକଙ୍କ ମାଟିଘର ଭାଙ୍ଗି ଯାଇଥିବାବେଳେ ମୁର୍ଷୂଣ୍ଢି ଓ କରଞ୍ଜକଟା ଠାରେ ରାଜପଥ ଉପରେ ବିରାଟ କାୟ ଗଛ ଉପୁଡି ପଡିବାରୁ ଦୀର୍ଘ ସମୟ ଧରି ଯାତାୟାତ ବାଧାପ୍ରାପ୍ତ ହୋଇଥିଲା ।
ଅନେକ ସ୍ଥାନରେ ବିଲବାଡି ଉପରେ ପାଞ୍ଚ ଫୁଟ ଉଚ୍ଚର ବନ୍ୟା ପାଣି ପ୍ରବାହିତ ହେଉଥିବାବେଳେ ବୌଦ୍ଧର କଚେରୀ ପଡିଆ ମଧ୍ୟ ସମ୍ପୂର୍ଣ୍ଣ ବୁଡିଯାଇଛି । ସେପଟେ ଗୁନ୍ଦୁଳିଆ ପଞ୍ଚାୟତ ତିଲପଙ୍ଗା ଗ୍ରାମର ଜଣେ ଗରିବ ବିଧବା ମହିଳା ଚନ୍ଦନ ତୁଳା ସାହୁଙ୍କ ଘର କାନ୍ଥ ଭୁଷୁଡି ପଡିବାରୁ ଲକ୍ଷାଧିକ ଟଙ୍କାର ଦଶଟି ଛେଳି ଘଟଣାସ୍ଥଳରେ ମୃତ୍ୟୁବରଣ କରିଥିବା ସୂଚନା ମିଳିଛି ।
ମହିଳା ଜଣକ ଅତ୍ୟନ୍ତ ଗରିବ ଶ୍ରେଣୀର ହୋଇଥିବାବେଳେ ଛେଳି ଚାଷ କରି ପାଞ୍ଚ ପ୍ରାଣୀ କୁଟୁମ୍ବକୁ ପୋଷୁଥିଲେ । ତେବେ ଏଭଳି ବିପତ୍ତି ସମୟରେ ଉତ୍ସର୍ଗ ଅନୁଷ୍ଠାନ ପକ୍ଷରୁ ବୌଦ୍ଧ ଡାକ୍ତରଖାନା ନିକଟରେ ଅସହାୟ ଲୋକଙ୍କ ପାଇଁ ରନ୍ଧା ଖାଦ୍ୟ ଯୋଗାଇ ଦିଆଯାଇଥିଲା ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ