ବୌଦ୍ଧ: ଅଦିନିଆ ବର୍ଷା ପାଇଁ ଜିଲ୍ଲାର ବିଭିନ୍ନ ଧାନ ମଣ୍ଡିରେ ଚାଷୀ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛି । ଧାନ ମଣ୍ଡିରେ ଗୋଟିଏ ପଟରେ ଚାଷୀର ଧାନ ଭିଜି ବତୁରି ଯାଇଥିବାବେଳେ ଅନ୍ୟପଟରେ କଟନୀ ଛଟନୀ ସମସ୍ୟାରେ ଛନ୍ଦି ହୋଇଛି ଚାଷୀ ।
ଅଦିନିଆ ବର୍ଷାରେ ଭିଜୁଛି ଚାଷୀଙ୍କ ଧାନ: କଟନୀ ଛଟନୀକୁ ନେଇ ଦ୍ବନ୍ଦ୍ବ, ପ୍ରଶାସନକୁ ଦାବିପତ୍ର ପ୍ରଦାନ ଜିଲ୍ଲାର କଣ୍ଟାମାଳ ବ୍ଲକ ବିଭିନ୍ନ ଧାନ ମଣ୍ଡିରେ ଚାଷୀ ବିକ୍ରି ପାଇଁ ଆଣିଥିବା ଧାନ ବର୍ଷା ଯୋଗୁଁ ଜରିପାଲ ଟାଣି ଘୋଡାଇ ରଖିଥିଲା । କିନ୍ତୁ ଅନେକ ସ୍ଥାନରେ ବର୍ଷାରେ ଧାନସବୁ ଭିଜି ବତୁରି ଯାଇଥିବା ଅଭିଯୋଗ ହୋଇଛି । ଗୋଟିଏ ପଟରେ ଚାଷୀ ଉପରେ ପ୍ରକୃତି ଦାଉ ସାଧୁ ଥିବାବେଳେ ଅନ୍ୟପଟରେ ବିଭିନ୍ନ ଧାନ ମଣ୍ଡିରେ କଟନୀ ଛଟନୀ ଯୋଗୁଁ ଚାଷୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛି ।
ଏନେଇ ସ୍ଥାନୀୟ ବୁଦ୍ଧିଜୀବୀ ତୀବ୍ର ଅସନ୍ତୋଷ ପ୍ରକାଶ କରି ଥିବାବେଳେ ବର୍ଷା ଯୋଗୁଁ ଚାଷୀଙ୍କୁ କିଛିଦିନ ପାଇଁ ଅଳ୍ପ ଧାନ ଆଣିବାକୁ କୁହାଯାଇଥିବା କଣ୍ଟାମାଳ ପ୍ୟାକ୍ସର ସମ୍ପାଦକ କହିଛନ୍ତି । ସେପଟେ ଚାଷୀଙ୍କ ବିଭିନ୍ନ ସମସ୍ୟା ଓ ଧାନକ୍ରୟକୁ ନେଇ ଜିଲ୍ଲା ଭାରତୀୟ କିଷାନ ସଙ୍ଘ ପକ୍ଷରୁ ଏକ ଦାବିପତ୍ର ବ୍ଲକ ପ୍ରଶାସନକୁ ପ୍ରଦାନ କରାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
