ବୌଦ୍ଧ: ଅପହଞ୍ଚ ଅଞ୍ଚଳରେ ଅବ୍ୟବସ୍ଥା ପାଲଟିଛି ସରକାରୀ ଛାତ୍ରୀ ନିବାସ । ମାଓ ଅଧ୍ୟୁଷିତ ପଞ୍ଚାୟତରେ ଥିବା ଏକମାତ୍ର ଛାତ୍ରୀ ହଷ୍ଟେଲର ପରିଚାଳନା ସଠିକ ଭାବେ ହେଉନାହିଁ । ଆଦିବାସୀ ଛାତ୍ରୀଙ୍କ ନିମନ୍ତେ ଉଦ୍ଦିଷ୍ଟ ହଷ୍ଟେଲକୁ ସମ୍ଭାଳୁଛନ୍ତି ଜଣେ ରୋଷେଇଆ । ଘଟଣା ଶୁଣିବାକୁ ନିଶ୍ଟିତ ଅଡୁଆ ଲାଗୁଥିବ । କିନ୍ତୁ ଏହା ସମ୍ପୂର୍ଣ୍ଣ ସତ୍ୟ । ଜିଲ୍ଲାର ମାଓ ଅଧ୍ୟୁଷିତ ତଥା ଉପାନ୍ତ ଅଞ୍ଚଳ ତଳଗାଁ ପଞ୍ଚାୟତରେ ଦେଖିବାକୁ ମିଳିଛି ଏହି ଚିତ୍ର ।
ଭିଡ଼ିଓ ସୌଜନ୍ୟ: ସମ୍ବାଦଦାତା, ବୌଦ୍ଧ
ପଞ୍ଚାୟତ କାର୍ଯ୍ୟାଳୟର ଠିକ ସମ୍ମୁଖରେ ରହିଛି ତଳଗାଁ ଉଚ୍ଚ ବିଦ୍ୟାଳୟ । ଏଠାରେ ଅଧ୍ୟୟନ କରୁଥିବା ଆଦିବାସୀ ଛାତ୍ରୀଙ୍କ ନିମନ୍ତେ ରହିଛି ଶହେ ଶଯ୍ୟା ବିଶିଷ୍ଟ ଛାତ୍ରୀ ନିବାସ । କିନ୍ତୁ ହଷ୍ଟେଲରେ ବର୍ତ୍ତମାନ ପଚାଶ ଜଣ ଛାତ୍ରୀ ରହୁଥିବା ବେଳେ ସେମାନଙ୍କ ପାଇଁ ରହିଛି 20ଟି ବେଡ଼୍ । ଅଧିକ ଶୋଚନୀୟ ସାଜିଛି ରୋଷେଇ ନିମନ୍ତେ ବାସନ । ଆବଶ୍ୟକୀୟ ବାସନ ନଥିବାରୁ ଅସ୍ବାଭାବିକ ପରିସ୍ଥିତି ସୃଷ୍ଟି ହେଉଛି ।