ବୌଦ୍ଧ: କୋରୋନା ଜନିତ ମୃତ୍ୟୁ ଆଶଙ୍କାରେ ଦୀର୍ଘ 15 ଘଣ୍ଟାରୁ ଉର୍ଦ୍ଧ୍ବ ସମୟ ପଡିରହିଲା ଶିକ୍ଷକଙ୍କ ମୃତଦେହ । ଶେଷରେ ବ୍ଲକ ପ୍ରଶାସନର ହସ୍ତକ୍ଷେପ ପରେ ନିକଟ ସମ୍ପର୍କୀୟଙ୍କୁ ବୁଝାସୁଝା ପରେ ମୃତଦେହ ସତ୍କାର ହୋଇଛି । ଏଭଳି ଅଭାବନୀୟ ଘଟଣା ଘଟିଛି ବୌଦ୍ଧ ଜିଲ୍ଲାର ଧଳପୁରରେ ।
ଘଟଣାଅନୁସାରେ ଧଳପୁର ଡାକ୍ତରଖାନା ନିକଟରେ ବାସ କରୁଥିବା ଜଣେ ଅବସରପ୍ରାପ୍ତ ସଂସ୍କୃତ ଶିକ୍ଷକ ଗତ କିଛି ଦିନ ପୂର୍ବରୁ କୁମ୍ଭମେଳାରୁ ବ୍ରହ୍ମପୁର ଦେଇ ଫେରିବା ପରେ ଅସୁସ୍ଥ ଥିଲେ । ପରେ ତାଙ୍କ ସ୍ବାବ ଟେଷ୍ଟ ପାଇଁ ପଠାଯାଇଥିଲା । ତେବେ ରିପୋର୍ଟ ଆସିବା ପୂର୍ବରୁ ଗତକାଲି ବିଳମ୍ବିତ ରାତିରେ ତାଙ୍କ ମୃତ୍ୟୁ ହୋଇଯାଇଥିଲା । ମୃତ୍ୟୁ ଖବର ମିଳିବା ପରେ ମୃତ୍ଯୁ କୋରୋନା ସଂକ୍ରମଣ ଜନିତ ସନ୍ଦେହ କରି କୌଣସି ନିକଟ ସମ୍ପର୍କୀୟ କିମ୍ବା ସାହି ପଡିଶା ଲୋକେ ଆସିଲେ ନାହିଁ । ଫଳରେ ମୃତଦେହ ନିକଟରେ ଏକାକୀ ପତ୍ନୀ କେବଳ ଅସହାୟ ଅବସ୍ଥାରେ ଦୀର୍ଘ ସମୟ ଧରି କାନ୍ଦୁଥିବା ଦେଖିବାକୁ ମିଳିଥିଲା । ଶେଷରେ ହରଭଙ୍ଗା ବିଡ଼ିଓ ଘଟଣା ସ୍ଥଳରେ ପହଞ୍ଚି ନିକଟ ସମ୍ପର୍କୀୟଙ୍କୁ ବୁଝାଶୁଝା ପରେ ବୌଦ୍ଧରୁ ଏକ ଆମ୍ବୁଲାନ୍ସ ମଗାଯାଇ ସେଥିରେ ପିପିଇ କିଟ ପିନ୍ଧି ସମ୍ପର୍କୀୟମାନେ ଧଳପୁର ମହାନଦୀ ଘାଟରେ ମୃତଦେହ ସତ୍କାର କରିଥିବା ଜଣାପଡିଛି । ସେପଟେ ଆଜି ବୌଦ୍ଧ କୋଭିଡ ସେଣ୍ଟରରେ ଚିକିତ୍ସାଧିନ ଅବସ୍ଥାରେ ଜଣେ ମହିଳାଙ୍କ ମୃତ୍ୟୁ ହୋଇଯାଇଥିବା ସୂଚନା ମିଳିଛି ।
ବୌଦ୍ଧରୁ ସତ୍ଯ ନାରାୟଣ ପାଣି, ଇଟିଭି ଭାରତ