ବୌଦ୍ଧ: କୋରୋନା ପାଇଁ ସରକାର ଲାଗୁ କରିଥିବା ଲକଡାଉନ ଯୋଗୁଁ ସାଧାରଣ ଜନଜୀବନ ଅସ୍ତବ୍ୟସ୍ତ ରହୁଥିବା ବେଳେ ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ ଅପରାଧିକ ମାମଲା ବୃଦ୍ଧି ପାଇବାରେ ଲାଗିଛି । ଗତବର୍ଷ ଲକଡାଉନ ସମୟରେ ବୌଦ୍ଧ ଜିଲ୍ଲାର ବିଭିନ୍ନ ଥାନା ଅଞ୍ଚଳରେ କୋଡିଏରୁ ଊର୍ଦ୍ଧ୍ବ ମାମଲା ସମ୍ମୁଖକୁ ଆସିଥିବା ବେଳେ ବର୍ତ୍ତମାନ ଲକଡାଉନ ସମୟରେ ମଧ୍ୟ ଏଭଳି ଘଟଣା ସମ୍ମୁଖକୁ ଆସିବାରେ ଲାଗିଛି । ବିଶେଷ ଭାବରେ ଘରୋଇ ହିଂସା, ଗାଁ ବସ୍ତିରେ ଗଣ୍ଡଗୋଳ, ସାମାଜିକ ବାସନ୍ଦ ଭଳି ଘଟଣା ସମ୍ମୁଖକୁ ଆସିଛି ।
ଲକଡାଉନ ସମୟରେ ବୃଦ୍ଧି ପାଉଛି ଅପରାଧିକ ମାମଲା
ତେବେ ବୌଦ୍ଧ ଥାନା ଅନ୍ତର୍ଗତ ମଥୁରା ପଞ୍ଚାୟତ ବଡସୁବଳିୟା ଗ୍ରାମର ଏକ ପରିବାରକୁ ସାମାଜିକ ବାସନ୍ଦ କରାଯିବା ସହ ପରିବାର ଉପରେ ଆକ୍ରମଣ ହୋଇଥିବା ଥାନାରେ ଅଭିଯୋଗ ହୋଇଛି । ସେପଟେ ମନମୁଣ୍ଡା ଥାନା ଅନ୍ତର୍ଗତ ଶୁଣ୍ଢିପଦର ପଞ୍ଚାୟତ ମନୋହରପୁର ଗ୍ରାମରେ ଗୁରୁବାର ରାତିରେ ବଡ ଭାଇର ଟାଙ୍ଗିଆ ଚୋଟରେ ସାନ ଭାଇର ମୃତ୍ୟୁ ହୋଇଥିବା ଅଭିଯୋଗ ହୋଇଛି ।