ରାଧାନଗର ପଞ୍ଚାୟତରେ ଆବାସ ଯୋଜନାରେ ଦୁର୍ନୀତି !

ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଅନ୍ତର୍ଗତ ରାଧାନଗର ପଞ୍ଚାୟତର ଲାଣ୍ଡିବନ୍ଧ ଓ ବଡବାଗବର ଗାଁରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ଅଭିଯୋଗ ଆସିଛି ।

ବୌଦ୍ଧ: ପୁଣି ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ଅଭିଯୋଗ । ଏହି ଅଭିଯୋଗ ହୋଇଛି ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଅନ୍ତର୍ଗତ ରାଧାନଗର ପଞ୍ଚାୟତର ଲାଣ୍ଡିବନ୍ଧ ଓ ବଡବାଗବର ଗାଁରେ ।

10 ରୁ 20 ହଜାର ଟଙ୍କା ଲାଞ୍ଚ ନଦେଲେ ହିତାଧିକାରୀଙ୍କୁ ପକ୍କା ଘର ମିଳୁନାହିଁ । ଏପରିକି ଭିକ୍ଷା ବୃତ୍ତି ଓ ବେସାହାରା ହିତାଧିକାରୀଙ୍କୁ ମଧ୍ୟ ଟଙ୍କା ପାଇଁ ବାଧ୍ୟ କରାଯାଉଥିବା ସାଙ୍ଘାତିକ ଅଭିଯୋଗ ହୋଇଛି । ଲାଣ୍ଡିବନ୍ଧ ଓ ବଡବାଗବର ଗାଁରେ ଏଭଳି ଅନେକ ହିତାଧିକାରୀଙ୍କୁ ଟଙ୍କା ନଦେବାରୁ ପଞ୍ଚାୟତ ପକ୍ଷରୁ ଘର ପ୍ରଦାନ କରାଯାଉ ନାହିଁ ।

ବୌଦ୍ଧ ଜିଲ୍ଲାର ବିଭିନ୍ନ ପଞ୍ଚାୟତରେ ଆବାସ ଯୋଜନାରେ ହେଉଥିବା ଦୁର୍ନୀତି ଏବେ ଦାଣ୍ଡରେ ପଡି ହାଟରେ ଗଡୁଛି । ଏପରିକି ହରଭଙ୍ଗା ବିଡିଓଙ୍କୁ ରାଜ୍ୟ ସରକାର ନିଲମ୍ବନ ମଧ୍ୟ କରିସାରିଛନ୍ତି । ଏପରି ଦୁର୍ନୀତିକୁ ନେଇ ବୁଦ୍ଧିଜୀବୀ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ଏ ସମ୍ପର୍କରେ ପଞ୍ଚାୟତ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ