ବୌଦ୍ଧ: ଜିଲ୍ଲାରେ ବାଟବଣା ମନରେଗା ଯୋଜନା । ସରକାର ଶ୍ରମିକଙ୍କୁ କାମ ଯୋଗାଇ ଦେବା ଲକ୍ଷ୍ୟରେ ମହାତ୍ମାଗାନ୍ଧୀ ନିଶ୍ଚିତ କର୍ମନିଯୁକ୍ତି ଯୋଜନା ପ୍ରଣୟନ କରିଛନ୍ତି । କିନ୍ତୁ, ଏହାର ବାସ୍ତବ ଚିତ୍ର ସମ୍ପୂର୍ଣ୍ଣ ଓଲଟା । ବୌଦ୍ଧ ଜିଲ୍ଲାର ବିଭିନ୍ନ ପଞ୍ଚାୟତରେ ବର୍ତ୍ତମାନ ଏହି ମନରେଗା ଯୋଜନାର ଏକ ବଡ ରାକେଟ କାର୍ଯ୍ୟ କରୁଛି । ପୋଖରୀ ଖନନ ଓ ରାସ୍ତା ନିର୍ମାଣ ନାଁରେ କେବଳ ଶ୍ରମିକଙ୍କ ଜବକାର୍ଡ ଓ ମିଥ୍ୟା ବିଲ ଭାଉଚର କରି କୋଟି କୋଟି ଟଙ୍କାର ଦୁର୍ନୀତି ହେଉଥିବା ଅଭିଯୋଗ ହୋଇଛି ।
ବୌଦ୍ଧ ଜିଲ୍ଲା ସଦର ବ୍ଲକ ଅନ୍ତର୍ଗତ ବହିରା, ମନୁପାଲି, ଗୋଛାପଡା ଭଳି ପଞ୍ଚାୟତରେ ଦିନରାତି ମନରେଗା କାର୍ଯ୍ୟରେ ମେସିନ ବ୍ୟବହାର ହେଉଛି । ବହିରା ଗ୍ରାମର ବଡ ବନ୍ଧର ଉନ୍ନତି ପାଇଁ ମନରେଗା ଯୋଜନାରେ ୮ ଲକ୍ଷ ଟଙ୍କା ଖର୍ଚ୍ଚ ହେଉଥିବା ବେଳେ ସେଠାରେ ଜଣେ ମଧ୍ୟ ଶ୍ରମିକ ନିୟୋଜିତ ହୋଇନାହାନ୍ତି । ସେହିପରି ଗୋଛାପଡା ପଞ୍ଚାୟତ ତ୍ରୀବେଣୀପୁର ବନ୍ଧ କାର୍ଯ୍ୟରେ ଜେସିବି ବ୍ୟବହାର କରାଯାଇ ପୁରୁଣା କାର୍ଯ୍ୟକୁ ନୂଆ କାମ ଦର୍ଶାଯାଉଥିବା ନେଇ ଅଭିଯୋଗ ହୋଇଛି । ତେବେ ଶ୍ରମିକ ମାନେ ପ୍ରଭାବିତ ନହେବା ପାଇଁ ସରକାର ମନରେଗା ଯୋଜନା କରିଥିଲେ ମଧ୍ୟ ଜିଲ୍ଲାର ବିଭିନ୍ନ ସ୍ଥାନରେ ଏଭଳି ଦୁର୍ନୀତିକୁ ନେଇ ବୁଦ୍ଧିଜୀବୀ ଗଭୀର ଉଦବେଗ ପ୍ରକାଶ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ