ବୌଦ୍ଧ: ଜିଲ୍ଲାରେ ଅଣାୟତ୍ତ କୋରୋନା ସଂକ୍ରମଣ । ପ୍ରତିଦିନ ସଂକ୍ରମଣ ବୃଦ୍ଧି ପାଉଥିବା ବେଳେ ଆଜି(ରବିବାର) ଜିଲ୍ଲାରୁ ରେକର୍ଡ ସଂଖ୍ୟକ 277 ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ସଂକ୍ରମିତ ଭୟ ଥିବା ଅଞ୍ଚଳ ଗୁଡିକୁ ଜିଲ୍ଲା ପ୍ରଶାସନ କଣ୍ଟେନମେଣ୍ଟ ଜୋନ ଘୋଷଣା କରିଥିଲେ ମଧ୍ୟ କିଛି ଅମାନିଆଙ୍କ ଯୋଗୁଁ ସଂକ୍ରମଣ ଦୃତ ଗତିରେ ବୃଦ୍ଧି ପାଇବା ସହ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଉଛି ।
ଶନିବାର ଦିନ ବାମଣ୍ଡା ପଞ୍ଚାୟତର ଦେବଗଡ଼ ଗ୍ରାମରୁ ତିନି ଜଣଙ୍କ କୋରୋନାରେ ମୃତ୍ୟୁ ହୋଇଥିବା ଚର୍ଚ୍ଚା ହେଉଥିବା ବେଳେ ବାମଣ୍ଡା ସରପଞ୍ଚ ଆକ୍ରାନ୍ତ ହୋଇ ହୋମ ଆଇସୋଲେସନରେ ଥିଲେ ସୁଦ୍ଧା ଗ୍ରାମକୁ କଣ୍ଟେନମେଣ୍ଟ କରାଯାଇ ପାରିନାହିଁ । ତେବେ ଏଭଳି ସମୟରେ ବିଶେଷ ଭାବରେ ପ୍ରଭାବିତ ହେଉଛନ୍ତି ସାଧାରଣ ରୋଗୀ ଓ କୋରୋନା ରୋଗୀଙ୍କ ସମ୍ପର୍କୀୟ ।
ସେପଟେ ଲକଡାଉନ ଯୋଗୁଁ ରବିବାର ବୌଦ୍ଧର ଆହାର କେନ୍ଦ୍ର ବନ୍ଦ ଥିବାରୁ ରୋଗୀଙ୍କ ସମ୍ପର୍କୀୟମାନେ ଖାଦ୍ୟ ମୁଠାଏ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଥିଲା । ଠିକ ଏହି ସମୟରେ ପରୀ ଅନୁଷ୍ଠାନର ଯୁବ ସ୍ବେଚ୍ଛାସେବୀ ମାନେ ଦେବଦୂତ ଭଳି ରନ୍ଧାଖାଦ୍ୟ ଆଣି ଡାକ୍ତରଖାନା ନିକଟରେ ରୋଗୀଙ୍କ ସମ୍ପର୍କୀୟ ଓ ଅନ୍ୟ ଅସହାୟଙ୍କୁ ଯୋଗାଇ ଥିଲେ । ଯୁବକମାନଙ୍କ ଏଭଳି ଉଦ୍ୟମକୁ ବିଭିନ୍ନ ମହଲରୁ ପ୍ରଶଂସା କରାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ