ବୌଦ୍ଧ:ଶେଷ ହେଇଯାଇଛି ବୌଦ୍ଧ ଓ କନ୍ଧମାଳ ଜିଲ୍ଲାର ସମବାୟ ବ୍ୟାଙ୍କ ପରିଚାଳନା କମିଟିର ସଭାପତି ନିର୍ବାଚନ । ଏକ ନାଟକୀୟ ଢଙ୍ଗରେ ସଭାପତି ପଦ ପାଇଁ ନିର୍ବାଚନ ହୋଇଥିଲା । ସମବାୟ ବ୍ୟାଙ୍କ ପରିଚାଳନା କମିଟିର ସଭାପତି ହୋଇଛନ୍ତି ଅରୁଣ କୁମାର ପ୍ରଧାନ।
ମିଳିଥିବା ସୂଚନା ଅନୁଯାୟୀ, ଉଭୟ ବୌଦ୍ଧ ଓ କନ୍ଧମାଳ ଜିଲ୍ଲାର ମୋଟ ପନ୍ଦରଟି ଜୋନର ନିର୍ବାଚିତ ସଦସ୍ୟଙ୍କ ମଧ୍ୟରୁ କିଶୋର ମେହେରଙ୍କୁ ସଭାପତି ପଦ ପାଇଁ ସହମତି ପ୍ରକାଶ ପାଇଥିଲା । କିନ୍ତୁ ସହମତି ହ୍ବିପକୁ ଅବମାନନା କରି ଅରୁଣ କୁମାର ପ୍ରଧାନ ସଭାପତି ପଦ ପାଇଁ ନାମାଙ୍କନ ଦାଖଲ କରିଥିଲେ । ବୁଧବାର ବୌଦ୍ଧ କେନ୍ଦ୍ର ସମବାୟ ବ୍ୟାଙ୍କ ସଭାପତି ପଦ ପାଇଁ ନିର୍ବାଚନ ଅନୁଷ୍ଠିତ ହୋଇଥିବା ବେଳେ ଉଭୟ ପ୍ରାର୍ଥୀଙ୍କ ସପକ୍ଷରେ ସାତଟି ଲେଖାଏଁ ଭୋଟ ପଡିଥିଲା ।
ନିର୍ବାଚନରେ ଜଣେ ଭୋଟର ଅନୁପସ୍ଥିତ ଥିବା କାରଣରୁ ନିର୍ବାଚନ ଟାଏ ହୋଇଥିବା ବେଳେ ଶେଷରେ ଲଟେରୀ ମାଧ୍ୟମରେ ସଭାପତି ଚୟନ କରାଯାଇଥିଲା । ନିର୍ବାଚନ ଅଧିକାରୀ ଭାବରେ ଅତିରିକ୍ତ ଜିଲ୍ଲାପାଳ ବବିତା ରାଣୀ ଦଳବେହେରାଙ୍କ ଉପସ୍ଥିତିରେ ଏହି ଲଟେରୀ ଅନୁଷ୍ଠିତ ହୋଇଥିବା ବେଳେ ହଠାତ ଅରୁଣ କୁମାର ପ୍ରଧାନ ସଭାପତି ରୂପେ ଚୟନ ହୋଇଥିଲେ ।