ଦୁର୍ଘଟଣା ଘଟାଇ ଆମ୍ବୁଲାନ୍ସ ଫେରାର; 3 ଆହତ

ଆମ୍ବୁଲାନ୍ସର ଅମାନବୀୟ କାର୍ଯ୍ୟ । ଦୁର୍ଘଟଣା ଘଟାଇ ଫେରାର । ସ୍ଥାନୀୟ ଅଞ୍ଚଳରେ ଉତ୍ତେଜନା ।

ବୌଦ୍ଧ: ସାହାଯ୍ୟକାରୀ ଯଦି ପାଲଟିବ ବିନାଶକାରୀ ତେବେ ବିଶ୍ବାସ କରିବ କାହାକୁ । ଏମିତି ଏକ ଅମାନବୀୟ ଘଟଣା ଘଟିଛି ବୌଦ୍ଧ ଜିଲ୍ଲା ବୀରନରସିଂହପୁର ଅଞ୍ଚଳରେ । ରୋଗୀଙ୍କୁ ନେଇ ଡାକ୍ତରଖାନା ପହଞ୍ଚାଇଥିବା ଆମ୍ବୁଲାନ୍ସ ଶେଷରେ ମୃତ୍ୟୁ ମୁଖକୁ ଠେଲିଦେଇଛି 3ଜଣ ନିରୀହ ଲୋକଙ୍କୁ । ସୂଚନା ମୁତାବକ ଖଜୁରୀପଡା ଗାଁରୁ ମଜୁରୀ କାମ ସାରି ନିଜ ଗାଁ ଫକୀରପୁର ଓ ବଳରାମପୁରକୁ ଫେରୁଥିଲେ 3ଜଣ ଶ୍ରମିକ । ଫେରିବା ବାଟରେ ବୀରନରସିଂପୁର ଛକଠାରେ ଏକ ଆମ୍ବୁଲାନ୍ସ ସେମାନଙ୍କୁ ଧକ୍କା ଦେଇ ଫେରାର ହୋଇଯାଇଛି । ଦୁର୍ଘଟଣା ପରେ ଆମ୍ବୁଲାନ୍ସଟି ସେମାନଙ୍କୁ ଉଦ୍ଧାର କରି ହସ୍ପିଟାଲ ନେବା ପରିବର୍ତ୍ତେ ଘଟଣାସ୍ଥଳରୁ ଚମ୍ପଟ ମାରିଛି ।

ଫଳରେ ଆହତ ଅବସ୍ଥାରେ ପଡିଥିବା 3ଜଣଙ୍କୁ ସ୍ଥାନୀୟ ଲୋକେ ଉଦ୍ଧାର କରି ବୌଦ୍ଧ ଡାକ୍ତରଖାନାକୁ ପଠାଇଥିଲେ । ଆହତ 3 ଜଣଙ୍କ ମଧ୍ୟରୁ ବଳରାମପୁରର ସୁରେନ୍ଦ୍ର ନାଏକଙ୍କ ଅବସ୍ଥା ଗୁରୁତର ରହିଛି । ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ