ବୌଦ୍ଧ: ଜିଲ୍ଲାରେ ଗରିବ ହିତାଧିକାରୀଙ୍କ ପାଇଁ ଉଦ୍ଦିଷ୍ଟ ମନରେଗା ଯୋଜନା ଓ ଆବାସ ଯୋଜନା ବାଟବଣା ହୋଇଥିବା ଅଭିଯୋଗ ହୋଇଛି । ବୌଦ୍ଧ ଜିଲ୍ଲାର ହରଭଙ୍ଗା, ବୌଦ୍ଧ ଓ କଣ୍ଟାମାଳ ବ୍ଲକର ବିଭିନ୍ନ ପଞ୍ଚାୟତରେ ଅନେକ ଗରିବ ହିତାଧିକାରୀ ଆବାସ ଯୋଜନାରୁ ବାଦ ପଡିଥିବା ବେଳେ ଗୋଟିଏ ପରିବାରର ଏକାଧିକ ଲୋକଙ୍କୁ ପଞ୍ଚାୟତ ଜରିଆରେ ମିଳୁଛି ସରକାରୀ ପକ୍କା ଘର ।
ବୌଦ୍ଧ ଜିଲ୍ଲାରେ ଆବାସ ଓ ମନରେଗା କାର୍ଯ୍ୟରେ ବ୍ୟାପକ ଦୁର୍ନୀତି ଅଭିଯୋଗ
ସେହିପରି ମନରେଗା କାର୍ଯ୍ୟରେ ପ୍ରାୟ ଅଧିକାଂଶ ପଞ୍ଚାୟତରେ ଦୁର୍ନୀତି ଏକ ସାଧାରଣ କାର୍ଯ୍ୟ ହୋଇଯାଇଛି । ଗତବର୍ଷ ଏସବୁ ଦୁର୍ନୀତି ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ଉଦ୍ୟମ ଆରମ୍ଭ କରିଥିବା ଖୋଦ ପିଡିଡିଆରଡିଏଙ୍କୁ ଶେଷରେ ବଦଳି କରି ପଠାଇ ଦିଆଗଲା । ଦୁର୍ନୀତିର ତଦନ୍ତ ନାଁରେ କେବଳ କିଛି ତଳିଆ କର୍ମଚାରୀଙ୍କୁ ନାଲି ଆଖି ଦେଖାଇ ରିପୋର୍ଟ ତଲବ କରି ପ୍ରଶାସନ ଚୁପ ବସିଗଲା । ଫଳରେ ଜିଲ୍ଲାର ଅଧିକାଂଶ ସ୍ଥାନରେ ବନ୍ଧ, ପୋଖରୀ, ରାସ୍ତା, ପଡିଆ ନିର୍ମାଣ ଓ ଉନ୍ନତି କାର୍ଯ୍ୟରେ ଜେସିବି ମେସିନ ଓ ଟ୍ରାକ୍ଟର ଶ୍ରମିକଙ୍କ ସ୍ଥାନରେ ଲାଗିଲା ।