ଝିଅକୁ ଦେଖିବା ଆଗରୁ ଟ୍ରେନ ଧକ୍କାରେ ବୃଦ୍ଧ ମୃତ

ଝିଅକୁ ଦେଖିବା ରହିଗଲା ଅଧା । ଲେବଲ କ୍ରସିଂ ପାର ହେଉଥିବା ବେଳେ ବୃଦ୍ଧଙ୍କ ଉପରେ ମାଡିଗଲା ଟ୍ରେନ । ଘଟଣାସ୍ଥଳରେ ଚାଲିଗଲା ପ୍ରାଣ । ଭଦ୍ରକ ଚରମ୍ପା ତାରିଣୀ ଲେବେଲ କ୍ରସିଂ ନିକଟରେ ଘଟିଛି ଏହି ଘଟଣା ।

ଭଦ୍ରକ: ଏମିତିବି ଆସେ ମୃତ୍ୟୁ । ପରିଣତ ବୟସରେ ଝିଅକୁ ଦେଖିବାକୁ ଝିଅ ଶାଶୂ ଘରକୁ ଯାଉଥିବା ବେଳେ ବାପାଙ୍କ ଦୁର୍ଘଟଣାରେ ଚାଲିଗଲା ଜୀବନ । ଏମିତି ଦୁଃଖଦ ଘଟଣା ଘଟିଛି ଭଦ୍ରକ ଚରମ୍ପା ତାରିଣୀ ଲେବେଲ କ୍ରସିଂ ନିକଟରେ । ଲେବେଲ କ୍ରସିଂ ପାର ହେଉଥିବା ସମୟରେ ମାଡିଗଲା ଟ୍ରେନ । ଆଉ ଆଖି ପିଛୁଳାକେ ଚାଲିଗଲା ବୃଦ୍ଧଙ୍କ ଜୀବନ ।

ମୃତକ ଅର୍ଣ୍ଣପାଳ ଭଟ୍ଟପୁର ଗ୍ରାମର ଅର୍ଜୁନ ବେହେରା ବୋଲି ଜଣାପଡିଛି । 84 ବର୍ଷ ବୟସରେ ମଣିଷ ଚାଲିବାକୁ ଶକ୍ତି ନଥାଏ, କିନ୍ତୁ ଅର୍ଜୁନ ନିଜ ପଞ୍ଚାୟତ କାର୍ଯ୍ୟାଳୟରୁ ଭତ୍ତା ଟଙ୍କା ନେଇ ଜିନିଷ ପତ୍ର କିଣି ଚରମ୍ପା ବରାଳପୋଖରୀ ସ୍ଥିତ ନିଜ ଝିଅ ଘରକୁ ଯାଉଥିଲେ । ହେଲେ ବିଧିର ବିଧାନ କିଛି ଅଲଗା ଥିଲା । ଝିଅକୁ ଦେଖିବା ଆଗରୁ ଆଖି ବୁଜିଲା ବାପା ।

ବୟସାଧିକ କାରଣରୁ ଟ୍ରେନର ଶବ୍ଦ କି ହର୍ଣ୍ଣ ଶୁଭୁନଥିଲା । ଏହି ସମୟରେ ଟ୍ରେନ ବୃଦ୍ଧଙ୍କୁ ଧକ୍କା ଦେଇଥିଲା । ଘଟଣା ଜଣାପଡିବା ପରେ ପରିବାର ସହ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।

ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ