ଭଦ୍ରକ: ଶାଶୁ ଘର ନିର୍ଯାତନାରେ ବୋହୁ ଗୁରୁତର ଭାବେ ଆହତ ହୋଇଥିବା ଅଭିଯୋଗ ହୋଇଛି । ଶାଶୁ, ଶ୍ୱଶୁର, ଦିଅର ଓ ଯାଆ ମିଳିତ ଭାବେ ବୋହୁକୁ ମାଡମାରିବା ସହିତ ନାଳରେ ପକାଇ ବେକରେ ଗୋଡ ଦେଇ ଜୀବନରୁ ମାରି ଦେବାକୁ ଉଦ୍ୟମ କରିଥିବା ଅଭିଯୋଗ କରିଛନ୍ତି ପୀଡିତା । ଗୁରୁତର ଅବସ୍ଥାରେ ତିହିଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତୀ ହୋଇ ଚିକିତ୍ସାଧିନ ଥିବା ଅବସ୍ଥାରେ ଛାତି ଓ ପେଟର ଅଧିକ ଯନ୍ତ୍ରଣା ହେବାରୁ ତାଙ୍କୁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିବା ଜଣାପଡିଛି ।
ଖବର ଅନୁଯାୟୀ ଭଦ୍ରକ ଜିଲ୍ଲା ତିହିଡି ଥାନା ତାଳପଦା ପଞ୍ଚାୟତ ଅଧିନ ଗୋପସାହିର ଗୋବିନ୍ଦ ମାଝୀଙ୍କ ସ୍ତ୍ରୀ ହେମ ମାଝୀ 2013 ମସିହାରେ ଗୋବିନ୍ଦକୁ ବିବାହ କରିଥିଲେ । ବିବାହ ପରଠାରୁ ଶାଶୁ ଘର ଲୋକେ ତାଙ୍କୁ ମାନସିକ, ଶାରିରୀକ ନିର୍ଯ୍ୟାତନା ଦେଇ ଆସୁଥିବା ସୂଚନା ମିଳିଛି । ତେବେ ଆଜି ସାମାନ୍ୟ ଘଟଣାକୁ ଆଳ କରି ଶାଶୁ, ଶ୍ୱଶୁର, ଦିଅର ଓ ଯାଆ ମିଳିତ ଭାବେ ହେମଙ୍କୁ ଜୀବନରୁ ମାରି ଦେବା ପାଇଁ ଉଦ୍ୟମ କରିଥିଲେ ବୋଲି ଅଭିଯୋଗ ହୋଇଛି ।