କାର ଧକ୍କାରେ ଦୁଇ ନାବାଳକ ମୃତ

ଭଦ୍ରକ ଜିଲ୍ଲା ଦେଇ ଯାଇଥିବା 16 ନମ୍ବର ଜାତୀୟ ରାଜପଥର ନୂଆ ବସ ଷ୍ଟାଣ୍ଡ ନିକଟରେ ସଡକ ଦୁର୍ଘଟଣା । କାର ଧକ୍କାରେ ଦୁଇ ସାଇକେଲ ଆରୋହୀ ମୃତ ।

ଭଦ୍ରକ: ପୁଣି ମର୍ମନ୍ତୁଦ ସଡ଼କ ଦୁର୍ଘଟଣା । ଭଦ୍ରକ ଜିଲ୍ଲା ଦେଇ ଯାଇଥିବା 16 ନମ୍ବର ଜାତୀୟ ରାଜପଥର ନୂଆ ବସ ଷ୍ଟାଣ୍ଡ ନିକଟରେ କାର ଧକ୍କାରେ ଦୁଇ ସାଇକେଲ ଆରୋହୀଙ୍କର ମୃତ୍ୟୁ ଘଟିଛି। ଉଭୟ କୁଆଁସ ଗାଁର ହୋଇଥିବା ବେଳେ ମୃତ ସୁମିତ ସାହୁ ସରସ୍ବତୀ ଶିଶୁମନ୍ଦିରରେ ଅଷ୍ଟମ ଶ୍ରେଣୀର ଛାତ୍ର ଏବଂ ଶୁଭଙ୍କର ମଲ୍ଲିକ ସେଣ୍ଟ ଜାଭିଏର ବିଦ୍ୟାଳୟରେ ଦଶମ ଶ୍ରେଣୀରେ ପାଠ ପଢୁଥିଲେ ।

ସେପଟେ ଦୁର୍ଘଟଣା ଘଟାଇଥିବା କାରଟି ଘଟଣାସ୍ଥଳରୁ ଫେରାର । ଖବର ପାଇ ଘଟଣାସ୍ଥଳରେ ପହଞ୍ଚିଲା ଟାଉନ ପୋଲିସ । ଦୁଇ ମୃତଶରୀରକୁ ପୋଲିସ ଉଦ୍ଧାର କରି ଭଦ୍ରକ ମୁଖ୍ୟ ଚିକିତ୍ସାଳୟ ସ୍ଥାନାନ୍ତରିତ କରିଛି । ତେବେ ଦୁଇ ମୃତ ନାବାଳକ ହୋଇଥିବା ବେଳେ ସେମାନେ ସକାଳୁ ବୁଲିବାକୁ ବାହାରିଥିଲେ । ଘଟଣାସ୍ଥଳରେ ୨ ଟି ସାଇକେଲ ପଡିଥିବା ଦେଖିବାକୁ ମିଳିଛି।

ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ