ଭଦ୍ରକ: ଜିଲ୍ଲାର ୨୪ ନଂ ୱାର୍ଡରେ କଡା ସୁରକ୍ଷା ବ୍ୟବସ୍ଥା ମଧ୍ୟରେ ଜାରି ରହିଛି ମତଦାନ । ଗତକାଲି(ଗୁରୁବାର) ଏହି ୱାର୍ଡରେ ପୌର ନିର୍ବାଚନ ନେଇ ଭୋଟ ଗ୍ରହଣ ସମୟରେ ହିଂସାକାଣ୍ଡ ହୋଇଥିଲା । କିଛି ଅସାମାଜିକ ବ୍ୟକ୍ତି ବୁଥ ଭିତରେ ପଶି ମାରପିଟ କରିବା ସହ ଭଙ୍ଗାରୁଜା କରିଥିଲେ । ଏଥିଲାଗି ଏଠାରେ ପୁଣି ଆଜି(ଶୁକ୍ରବାର) ପୁନଃ ଭୋଟ ଗ୍ରହଣ ଅନୁଷ୍ଠିତ ହୋଇଛି ।
REPOLLING: କଡା ସୁରକ୍ଷା ମଧ୍ୟରେ ଭଦ୍ରକ ୨୪ ନଂ ୱାର୍ଡରେ ମତଦାନ ଜାରି
ଦୁର୍ବୃତ୍ତମାନେ EVMକୁ ମଧ୍ୟ ଭାଙ୍ଗିବାକୁ ଚେଷ୍ଟା କରିଥିଲେ । ଏନେଇ ପୋଲିସ ନିକଟରେ ଖବର ପହଞ୍ଚିବା ପରେ ପୋଲିସ ପରିସ୍ଥିତିକୁ ନିୟନ୍ତ୍ରଣ କରିଥିଲା । ଘଟଣାରେ ବିଭିନ୍ନ ରାଜନୈତିକ ଦଳର 4 ଜଣ ଆହତ ହୋଇଥିଲେ । ଏଥିଯୋଗୁଁ ଏହି ୱାର୍ଡର 65 ଓ 66 ନମ୍ବର ବୁଥ୍ରେ ପ୍ରଥମେ ମତଦାନ ବାଧାପ୍ରାପ୍ତ ହେବା ସହ ପରବର୍ତ୍ତୀ ସମୟରେ ଅଧିକ ଉତ୍ତେଜନାକୁ ଦୃଷ୍ଟିରେ ରଖି ସେଠାରେ ମତଦାନ ସମ୍ପୂର୍ଣ୍ଣ ଭାବେ ବନ୍ଦ ହୋଇଥିଲା । ଏନେଇ ପ୍ରଶାସନ ପକ୍ଷରୁ ଉକ୍ତ ବୁଥ୍ ଗୁଡ଼ିକରେ ସାନି ମତଦାନ ଲାଗି ରାଜ୍ୟ ନିର୍ବାଚନ ଆୟୋଗଙ୍କୁ ଅବଗତ କରାଯାଇଥିଲା ।