ଭଦ୍ରକ: ଦେଖନ୍ତୁ ଏ ଦୃଶ୍ୟ.... ବିପର୍ଯ୍ୟସ୍ତ ସ୍ଥିତିରେ ଭଦ୍ରକ ଜିଲ୍ଲାର ରାଘବାନନ୍ଦ ଚକ୍ଷୁ ଚିକିତ୍ସାଳୟ । ଅନେକ ମହତ ଲୋକଙ୍କ ପ୍ରଚେଷ୍ଟାରେ ପ୍ରତିଷ୍ଠିତ ଏହି ଚିକିତ୍ସାଳୟ ଏବେ ନିଜ ଲକ୍ଷ୍ୟ ଠାରୁ ବହୁ ଦୂରରେ । ଏଠାରେ ଆବଶ୍ୟକ ମୁତାବକ ନା ଅଛନ୍ତି ଡାକ୍ତର ନା ଅଛି ଅସ୍ତ୍ରୋପଚାର ସାମଗ୍ରୀ । ରକ୍ଷଣାବେକ୍ଷଣା ଅବହେଳାରୁ କାନ୍ଥ ଓ ଛାତ ଫାଟି ସବୁ ଆଁ କରିଛି ।
7ଟି ବ୍ଲକର ପ୍ରାୟ 15 ଲକ୍ଷରୁ ଊର୍ଦ୍ଧ୍ବ ଗ୍ରାମବାସୀ ନିର୍ଭର କରୁଥିବା ଏହି ଚକ୍ଷୁ ଚିକିତ୍ସାଳୟ ପ୍ରତି ଜିଲ୍ଲାପ୍ରଶାସନର ବିମୁଖତାକୁ ନେଇ ବାରମ୍ବାର ଅଭିଯୋଗ ହୋଇଛି । ଡାକ୍ତରଖାନାରେ ତିନୋଟି ଡାକ୍ତରଙ୍କ ବଦଳରେ ମାତ୍ର ଜଣେ ଡାକ୍ତର ଅଛନ୍ତି । ସେ ପୁଣି ନିୟମିତ ଡାକ୍ତର ନୁହନ୍ତି । ଯଦ୍ବାରା ଦୀର୍ଘ ଦିନ ଧରି ମୋତିଆବିନ୍ଦୁ ପରି ସାମାନ୍ୟ ଅସ୍ତ୍ରୋପଚାର ମଧ୍ୟ ବନ୍ଦ ହୋଇ ରହିଛି ।
ଚକ୍ଷୁ ପରି ଏକ ଗୁରୁତ୍ବପୂର୍ଣ୍ଣ ଅଙ୍ଗ ପ୍ରତି ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କ ଉଦାସିନତାକୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ତେବେ ଏହି ସମସ୍ୟାର ଶୀଘ୍ର ସମାଧାନ ନହେଲେ ଆଗାମୀ ଦିନରେ ଏହାର ଦୃଢ଼ ପ୍ରତିବାଦ କରାଯିବ ବୋଲି ଭଦ୍ରକ ଜିଲ୍ଲା କଂଗ୍ରେସ କମିଟି ସଭାପତି କହିଛନ୍ତି ।