ଭଦ୍ରକ: ପୁଣି ସାମ୍ନାକୁ ଆସିଲା ପୋଲିସର ଦବଙ୍ଗଗିରି । ଭାଇରାଲ ହେଲା ପୋଲିସ ବାହିନୀର ପୁଣି ଏକ ଦାଦାଗିରି ଭିଡିଓ । ଥାନା ଅଧିକାରୀଣୀଙ୍କ ଉପସ୍ଥିତିରେ ବିଚ୍ ରାସ୍ତା ଉପରେ ଜଣେ ଯୁବକଙ୍କୁ ଗୋଡାଇ ଗୋଡାଇ ମାଡ ମାରୁଛି ପୋଲିସ । ପରେ ଯୁବକ ଜଣଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି । ତେବେ ଯୁବକ ଜଣଙ୍କ ଦୋଷ ଏତିକି ଯେ, ସେ ମାସ୍କ ପିନ୍ଧି ନ ଥିଲେ ଏବଂ ଜୋରିମାନା ବାବଦକୁ ପୋଲିସକୁ 500 ଟଙ୍କା ନ ଦେବାକୁ ମନା କରି ଦେଇଥିଲେ । ଆଉ ଏହି ରାଗରେ ଆରମ୍ଭ ହୋଇଥିଲା ନିର୍ମମ ପ୍ରହାର । ବିଚ୍ ରାସ୍ତା ଉପରେ ନିର୍ଦୟଙ୍କୁ ଗୋଡେଇ ଗୋଡେଇ ମାରି ଚାଲିଥିଲା ବନ୍ତ ପୋଲିସ ।
ଏଠାରେ ଉଲ୍ଲେଖଯୋଗ୍ୟ ଯେ, ଏହି ଘଟଣାଟି ଗତ ମେ 9 ତାରିଖରେ ଘଟିଥିଲା । କିନ୍ତୁ ଗତକାଲି (ସୋମବାର) ବନ୍ତ ଅଞ୍ଚଳର ଜଣେ ଯୁବକ ଏହି ଘଟଣାର ଭିଡିଓ ପୋଲିସ ଡିଜିଙ୍କୁ ଟ୍ବିଟ୍ କରିବା ପରେ ଘଟଣା ଏବେ ସାମ୍ନାକୁ ଆସିଛି । ତେବେ ପଦକ୍ଷପ ଆଳରେ ଆଜି ଭଦ୍ରକ ପୋଲିସ ସେମାନଙ୍କ ଭିତରୁ ଜଣେ କନେଷ୍ଟବଳଙ୍କୁ ନିଲମ୍ବନ କରିଛି । ଅନ୍ୟପଟେ ମହିଳା କନେଷ୍ଟବଳଙ୍କୁ ଦୁର୍ବ୍ୟବହାର ନେଇ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ବନ୍ତ ଥାନାରେ ଏକ ମାମଲା ରୁଜୁ କରିଛି ଭଦ୍ରକ ପୋଲିସ ।